Օդեսայում ավելի քան 30.000 ստորագրություն են հավաքել Սաակաշվիլիին հեռացնելու համար

Ուկրաինայի Օդեսա նահանգում ստորագրահավաք է սկսվել նահանգապետ Միխեիլ Սաակաշվիլիին հեռացնելու համար, ակցիայի նախաձեռնության հեղինակը «Պյոտր Պորոշենկոյի բլոկ» կուսակցությունից Գերագույն ռադայի պատգամավոր Դմիտրի Գոլուբովն է, փոխանցում է ՏԱՍՍ գործակալությունը:

Նրա խոսքով՝ Սաակաշվիլին «իր աշխատանքի մեկ տարվա ընթացքում ոչինչ չի արել և ոչ մի բան չի արել մարդկանց կյանքն ինչ-որ չափով լավացնելու համար»:

«Նա չի կառուցել Օդեսա-Ռենի մայրուղու ոչ մի մետր, նա ձախողել է մաքսայինի պլանը, նրա խորհրդականների շրջանում կոռուպցիա կա, նրանք գումար են կորզում գործարարներից: Դրամաշորթություն, կաշառքներ և կոռուպցիա` այն ամենը, ինչով հայտնի է Սաակաշվիլին»,- ասել է Գոլուբովը:

Նա նշել է, որ մարտի 3-ից ի վեր արդեն ավելի քան 30.000 ստորագրություն է հավաքվել: