Բելգիական ոստիկանությունը 2 մարդու է ձերբակալել Բրյուսելի ահաբեկչությունների ֆոնին

Բելգիայի ոստիկանությունը երկու մարդու է ձերբակալել և արդեն ուսումնասիրում է Բրյուսելի օդանավակայանում պայթյուններ կազմակերպած անձանցից մեկի կադրերը տեսահսկման համակարգից, հաղորդում է The Daily Mail-ը:

Իրավապահները փորձում են գտնել հարձակումների հետևում կանգնած հնարավոր կասկածյալներին, և արդեն առնվազն երկու մարդ է ձերբակալվել Բրյուսելում՝ քաղաքի Հյուսիսային երկաթգծի կայարանի մոտակայքում:

Օդանավակայանի ողջ հատվածում տեղադրված է տեսահսկման համակարգ, այդ թվում նաև ժամանումների սրահում, որտեղ, հաղորդումների համաձայն, տեղի է ունեցել պայթյունը, գրում է լրատվամիջոցը:

Ուսումնասիրվում են նաև մետրոյի Մալբեկ կայարանից ստացված կադրերը, որտեղ պայթյունի հետևանքով 15 մարդ է զոհվել:

Բելգիայի արտգործնախարարությունը հայտարարել է, որ իրենց կարծիքով՝ ահաբեկչական հարձակումներում ներառված ահաբեկիչների մի մասը «դեռ ազատության մեջ է»։