ԱՄՆ-ում թուրք գործարար է ձերբակալվել

ԱՄՆ-ում ձերբակալվել է իրանական ծագմամբ թուրք գործարար՝ Իրանի դեմ պատժամիջոցները շրջանցելու փորձի համար։ Այդ մասին հայտնել է ԱՄՆ արդարադատության նախարարությունը, հաղորդում է korrespondent.net-ը։

Ռեզա Սարաֆը ձերբակալվել է մարտի 19-ին, Մայամիում: Նա բնակվում է Թուրքիայում և ունի երկքաղաքացիություն՝ թուրքական և իրանական: Նրա հետ միասին գործով անցնում է Իրանի երկու քաղաքացի, որոնց ձերբակալել չի հաջողվել:

Քննությունը կարծում է, որ գործարարը և նրա աջակիցները բազմամիլիոնանոց գործարքներ են իրականացրել, որոնց շահառուն եղել է Իրանի կառավարությունը և մի շարք իրանական ընկերություններ, որոնք հայտնվել են պատժամիջոցների տակ:

ԱՄՆ գլխավոր դատախազի օգնական Ջոն Քարլինի խոսքով՝ այդ գործարքներն իրականացնելով՝ նրանք խախտել են պատժամիջոցների ռեժիմը: Ենթադրյալ խախտումներն իրականացվել են 2010-2015 թվականներին։

Երեք մեղադրյալներից յուրաքանչյուրը մեղադրվում է խարդախության և պատժամիջոցների խախտման, ինչպես նաև բանկային խարդախության և փողերի լվացման նպատակով համաձայնության գալու համար։ Նրանցից յուրաքանչյուրին սպառնում է մի քանի տասնյակ տարի ազատազրկում։