Սալահ Աբդեսլամը չի իմացել Բրյուսելում ահաբեկչությունների պատրաստման մասին. փաստաբան

Անցած տարի Փարիզում իրականացված հարձակումների շարքում ներգրավվածության համար կասկածվող և անցած շաբաթ Բելգիայի մայրաքաղաքում ձերբակալված Սալահ Աբդեսլամի փաստաբանի խոսքով՝ իր պաշտպանյալը չի իմացել, որ Բրյուսելում մարտի 22-ին ծայրահեղականները հարձակում են պլանավորել, հաղորդում է BBC-ի ռուսական ծառայությունը։

Ավելի վաղ լրագրողները հաղորդել են վարկածի մասին, որ Բրյուսելի պայթյունները կապված են Աբդեսլամի ձերբակալության հետ:

Փաստաբան Սվեն Մարին հայտարարել է, որ իր պաշտպանյալը ցանկանում է հնարավորինս արագ վերադառնալ Ֆրանսիա:

«Սալահ Աբդեսլամն ինձ հայտնել է, որ ցանկանում է տեղափոխվել Ֆրանսիա և որքան հնարավոր է արագ»,- պատմել է Սվեն Մարին BFM հեռուստաալիքին։

Փաստաբանի խոսքով՝ Աբդեսլամը ցանկանում է «բացատրվել Ֆրանսիայում»։

Արտահանձնման մասին գործը կքննվի Բրյուսելի դատարանում մարտի 31-ին:

Ավելի վաղ փաստաբանը հայտնել էր, որ իր պաշտպանյալը բոլոր ուժերով հակառակվելու է Ֆրանսիա իր արտահանձնմանը։