Բելգիայում ահաբեկչություններից հետո վերցրել են ատոմակայանի աշխատակիցների անցագրերը. ԶԼՄ-ներ

Ատոմային անվտանգության բելգիական դաշնային գործակալությունը (AFCN) ատոմակայանի աշխատակիցների մի մասին զրկել է էլեկտրոնային անցագրերից և սահմանափակել է միջուկային օբյեկտների մուտքը մտավախությունից, որ ատոմակայանը կարող է դառնալ ծայրահեղականների թիրախ: Այդ մասին հայտնել է Associated Press-ը:

«Մի քանի մարդկանց մերժվել է միջուկային օբյեկտների մուտքը»,- ուրբաթ օրը հայտնել է AFCN-ի ներկայացուցիչ Նելե Շեերլինկը:

Շեերլինկը, սակայն, չի հաստատել, որ այդ որոշումը կապված է անմիջապես ահաբեկչությունների հետ:

Ավելի վաղ հաղորդվել էր, որ Բելգիայի իշխանությունները որպես նախազգուշական միջոց ահաբեկչություններից հետո երկրի երկու ատոմակայանների անձնակազմի մասամբ տարհանում են իրականացրել:

Ավելի վաղ Derniere Heure թերթը հայտարարել է, որ Բրյուսելի ահաբեկիչները մտադիր են եղել դիվերսիա իրականացնել Բելգիայի ատոմակայաններում, սակայն խմբի մասնակից Սալահ Աբդեսլամի մասնակցի ձերբակալությունը ստիպել է նրանց արագացնել իրենց գործողությունները և պայթյուններ կազմակերպել օդանավակայանում և մետրոյում:

Հիշեցնենք, որ Բրյուսելի միջազգային օդանավակայանում երկու պայթյուն է տեղի ունեցել, ևս մի պայթյուն է տեղի ունեցել մետրոյի «Մալբեկ» կայարանում՝ վագոնում։ Ահաբեկչությունների հետևանքով, ճգնաժամային կենտրոնի տվյալներով, մահացել է 32 մարդ, ևս 250-ը ստացել են վնասվածքներ: Հարձակումների պատասխանատվությունը ստանձնել է «Իսլամական պետություն» ահաբեկչական խմբավորումը: