Egypt Air-ի ինքնաթիռն առևանգողն անձնական շարժառիթներ է ունեցել. Կիպրոսի նախագահ

Կիպրոսի նախագահ Նիկոս Անաստասիադեսը հաստատել է, որ Egypt Air ավիաընկերության ինքնաթիռն առևանգողն անձնական շարժառիթներ է ունեցել, գրում է The Guardian-ը։

Կիպրոսի հանրային հեռուստառադիոընկերությունն ավելի վաղ հայտնել է, որ հավանաբար առևանգողն անձնական, այլ ոչ քաղաքական շարժառիթներ է ունեցել։

Լրատվամիջոցի հաղորդմամբ՝ նրա նախկին կինը Կիպրոսում է։ Ականատեսները հայտնել են, որ տղամարդն արաբերենով գրված նամակ է նետել օդանավից Լառնակայում՝ խնդրելով, որ այն հանձնեն իր նախկին կնոջը:

The Guardian-ը հայտնում է, որ այժմ հաղորդվում է, որ օդանավն առևանգողը լիբանանցի է։ Կիպրոսի ոստիկանության աղբյուրների հաղորդմամբ՝ նա քաղաքական ապաստան է պահանջում։

Տեղի լրատվամիջոցները, վկայակոչելով Կիպրոսի ոստիկանական աղբյուրներին, հայտնում են, որ առևանգողի նախկին կնոջն ուղեկցում են օդանավակայան՝ հանդիպելու իր նախկին ամուսնու հետ։

Հիշեցնենք, որ ավելի վաղ հաղորդվել է, որ Ալեքսանդրիա-Կահիրե չվերթն իրականացնող ուղևորատար ինքնաթիռն առևանգվել է։ Այն վայրէջք է կատարել Կիպրոսի Լառնակայի օդանավակայանում։