Ֆրանսիացի պատգամավորները կառավարության նիստի ժամանակ բարձրացրել են Ադրբեջանի ագրեսիայի հարցը

Ապրիլի 5-ին, Ազգային ժողովի նիստի ընթացքում Ֆրանսիայի կառավարությանն ուղղված հարցուպատասխանի ընթացքում քննարկվել է Լեռնային Ղարաբաղում տիրող իրավիճակը։

Ազգային Ժողովում սոցիալիստ, հանրապետական պատգամավոր Նատալի Նիեսոնը ներկայացրել է Լեռնային Ղարաբաղում տիրող լուրջ բախումները ադրբեջանական և հայկական ուժերի միջև, ընդգծելով, որ հրադադարի ռեժիմի խախտումը սանձազերծվել է Բաքվի կողմից:

Նատալի Նիեսոնը կառավարության ուշադրությունն է հրավիրել նաև Թուրքիայի կողմնակալ հայտարարությունների վրա, որոնք հարցեր են առաջացնում՝ միջազգային հանրության խաղաղության կոչերի ֆոնին:

Նատալի Նիեսոնը նշել է, որ հայ-ֆրանսիական բարեկամական հարաբերությունները, ինչպես նաև Ֆրանս-Ղարաբաղ բարեկամության շրջանակը և Մինսկի խմբում Ֆրանսիայի համանախագահությունը կարևոր հիմք են, որպեսզի Ֆրանսիան ուժեղ դերակատարություն ունենա հակամարտության կարգավորման մեջ։
 

Նատալի Նիենսոնի այն հարցին, թե ինչպիսի լուծում կարող է տալ Ֆրանսիան այս ծայրահեղ անկայուն իրավիճակին, պատասխանել է եվրոպական հարցերով պետքարտուղար Առլեմ Դեզիրը։

Առլեմ Դեզիրն իր պատասխանում նշել է, որ Ֆրանսիան, որպես ԵԱՀԿ Մինսկի Խմբի համանախագահ երկիր մեծ ուշադրությամբ հետևում է իրավիճակի զարգացման։ Նա նշել է նաև, որ Ֆրանսիայի նախագահը հրադադարի կոչ է արել հենց շաբաթ օրը, նույն օրը, Ֆրանսիայի արտգործնախարար Ժան-Մարկ Էյրոն բանակցություններ է վարել Հայաստանի, իսկ հետո Ադրբեջանի իր գործընկերների հետ, ինչն իր դրական արդյունքներն է տվել. կողմերը համաձայնության են եկել հրադադարի շուրջ, ինչպես նաև Մինսկի խմբի միջնորդներին ընդունելու հարցում, որոնք կմեկնեն այսօր իսկ Բաքու, այնուհետև Ստեփանակերտ և Երևան։ Առլեմ Դեզիրը եզրափակել է իր ելույթը՝ նշելով, որ ներկայիս իրադարձությունները ևս մեկ անգամ ապացուցում են, որ կայունության, համերաշխության և բարգավաճման հիմքը կարող է հանդիսանալ միայն Լեռնային Ղարաբաղի կարգավիճակի հարցի վերջնական լուծումը:

Պետքարտուղարն ընդգծել է, որ Ֆրանսիայի մշտական հանձնառությունը եղել է և մնում է Մինսկի Խմբի շրջանակներում բանակցությունների շարունակումը՝ ուժի կիրառման բացառման, տարածքային ամբողջականության և ժողովուրդների ինքնորոշման իրավունքի հիման վրա։ Սրանք են խաղաղության պայմանները, շեշտել է Առլեմ Դեզիրը:

Violents affrontements au Haut-Karabagh : un cessez-le-feu a été annoncé, il doit impérativement être respecté. #QAGhttps://t.co/3JgcZNVKN8

— Harlem Désir (@harlemdesir) April 5, 2016