G7-ի արտգործնախարարները կողմ են հանդես եկել Բաշար ալ-Ասադի հեռանալուն

«Մեծ յոթյակի» անդամ երկրների արտաքին քաղաքական գերատեսչությունների ղեկավարները հաստատել են իրենց դիրքորոշումը՝ պահանջելով, որ Սիրիայի նախագահ Բաշար ալ-Ասադը հեռանա երկրում հակամարտության քաղաքական կարգավորման շրջանակում։

Ինչպես տեղեկացնում է РИА Новости գործակալությունը, այդ մասին ասված է Հիրոշիմայի հանդիպման արդյունքներն ամփոփող հաղորդագրության մեջ։

«Սիրիան նոր կառավարության կարիք ունի, որը կներկայացնի երկրի բոլոր համայնքներն ու ունակ կլինի պաշտպանելու իր ժողովրդին, պայքարելու ահաբեկչության դեմ և վերակառուցելու Սիրիան»,-ասված է փաստաթղթում։

Հանդիպման մասնակիցները միջազգային հանրությանը կոչ են արել իրականացնել ՄԱԿ-ի Անվտանգության խորհրդի թիվ 2254 և 2268 բանաձևերը, այդ թվում՝ արագ, անվտանգ ու առանց խոչընդոտների բոլոր կողմերին մարդասիրական օգնության տրամադրումը։

Նախարարները հավաստիացրել են, որ աշխատում են երկարաժամկետ հետհակամարտային կայունացման ու Սիրիայի վերականգնման ուղղությամբ։

«Յոթյակը» լուրջ մտահոգություն է հայտնել Քիմիական զենքի արգելման կազմակերպության եզրակացությունների առնչությամբ, որ Սիրիայում 2015 թվականի ընթացքում քիմիական զենք է կիրառվել։

«Մենք ընդգծում ենք դրանում մեղավոր անձանց քրեական պատասխանատվության ենթարկելու կարևորությունն ու անհրաժեշտությունը»,-ասված է G7-ի հանդիպումն ամփոփող հայտարարության մեջ։

Այս շաբաթ Ժնևում մեկնարկում է միջսիրիական բանակցությունների հերթական փուլը, և կողմերի տարաձայնությունների հիմնական թեմաներից մեկը նախագահ Բաշար ալ-Ասադի ճակատագիրն է։

Սիրիական ընդդիմության մի մասը և Արևմուտքի երկրները պնդում են, որ նա հեռանա։ Այլ տեսակետ ունեն Ռուսաստանն ու սիրիական չափավոր ընդդիմությունը։