Փորձելով պարել այդ երկու կրակների միջև՝ մենք կորցնում ենք թե՛ մեկին, թե՛ մյուսին. Սոլովյովը՝ ԼՂ հակամարտության մասին (տեսանյութ)

Լեռնային Ղարաբաղի հակամարտության սրման առնչությամբ Ռուսաստանը մինչև հիմա չի ասել՝ ով սկսեց, մինչդեռ նշում է, որ կողմերին հաշտեցրեց Ռուսաստանը։ Այդ մասին «Կիրակնօրյա երեկոն Վլադիմիր Սոլովյովի հետ»՝ «Воскресный вечер с Владимиром Соловьёвым» հաղորդման ժամանակ հայտարարել է հաղորդավար Վլադիմիր Սոլովյովը։

«Մենք մինչև հիմա չենք պատասխանել մի պարզ հարցի՝ ո՞րն է մեր դիրքորոշումը: Հայաստանի համար ի՞նչ է Լեռնային Ղարաբաղը։ Այդ հարցին պետք է, չէ՞, պատասխանել: Իսկ պատկերացնո՞ւմ եք մի իրավիճակ, երբ Հայաստանը ճանաչում է Լեռնային Ղարաբաղը (անկախությունը-Խմբ.), Լեռնային Ղարաբաղում հանրաքվե է անցկացվում, նրանք գնում են Ղրիմի ճանապարհով, և մենք այդ ժամանակ ՀԱՊԿ-ի պայմաններով ի՞նչ պետք է անենք։ Պետք է պատերա՞զմ սկսենք Ադրբեջանի դեմ։ Նկատեք, որ Հայաստանի նախագահ Սերժ Սարգսյանը մեզ չի դնում նման բարդ վիճակի մեջ: Նա հնարավորություն է թողնում քաղաքական լուծման համար: Մենք ասում ենք՝ Ադրբեջանը մեր գործընկերն է, բայց մենք չե՞նք նկատել … Ադրբեջանի տնտեսական քաղաքականությունը շատ անկախ է, երբեմն ուղղակիորեն հակասում է մեր շահերին, մենք չե՞նք նկատել թուրք ղեկավարների տարբեր այցերը և հայտարարությունները»,- ասել է Սոլովյովը՝ նշելով, որ Ռուսաստանը չգիտես ինչու չի աշխատում Ադրբեջանի հետ այդ ուղղությամբ, բավականաչափ չի ներգրավում իր տնտեսական ուղեծրում։

«Այդկերպ փորձելով պարել այդ երկու կրակների միջև՝ մենք կորցնում ենք ինչպես մեկին, այնպես էլ մյուսին: Իմիջիայլոց այդ հակամարտության առնչությամբ մենք մինչև հիմա չենք ասել՝ ով սկսեց: Մենք պատասխան չենք տալիս: Մենք ասում ենք՝ ով բարիշեցրեց՝ մենք, իսկ ով սկսեց՝ չենք ասում»,- ասել է նա։

Երբ հաղորդմանը մասնակցող Ռուսաստանի պետդումայի փոխխոսնակ Սերգեյ Ժելեզնյակն ասել է, որ սկսել է երրորդ ուժը, «հավանաբար՝ թուրքական հատուկ ստորաբաժանումները», Սոլովյովը պատասխանել է՝ «իսկ ինչպե՞ս են նրանք այնտեղ հայտնվել»։

Տեսանյութում այդ հատվածը կարող եք դիտել 33-րդ րոպեից.