ԱՄՆ-ում ուսանողին իջեցրել են ինքնաթիռից` արաբերեն խոսելու համար

Կալիֆորնիայի համալսարանի ուսանողին ստիպողաբար իջեցրել են Southwest Airlines ավիաընկերության չվերթից` հեռախոսով արաբերեն խոսելու համար:

26-ամյա Հայրութդին Մակզումին կարծում է, որ ՀԴԲ-ի աշխատակիցներն իրեն ստորացուցիչ հարցաքննման են ենթարկել, և ընկերությունից պաշտոնական ներողություն է պահանջում, գրում է ՏԱՍՍ գործակալությունը:
 

Լոս Անջելեսի միջազգային օդանավակայանի ոստիկանական վարչությունը հաստատել է, որ միջադեպը տեղի է ունեցել ապրիլի 9-ին:

Բանն այն է, որ ուղևորներից մեկը լսել է` ինչպես է երիտասարդը հեռախոսով խոսելիս ասում «Իսլամական պետություն» խմբավորման անունը: Ուղևորն իր պարտքն է համարել այս մասին զեկուցել համապատասխան մարմիններին: Ոստիկանության աշխատակիցներն ուսանողին դուրս են բերել ինքնաթիռից` ՀԴԲ-ի բաժանմունքում հարցաքննելու համար։
 

«Պարզվել է, որ նա ոչ մի անօրինական բան չի ասել, ոչ մի սպառնալիք չի հնչեցրել: Այդ պատճառով էլ նրան բաց են թողել»,- նշել է ոստիկանության սպա Ռոբ Պեդրեգոնը։

Ավիաընկերությունում ոչ մի արտասովոր բան չեն նկատել միջադեպում։ Այնտեղ կարծում են, որ անվտանգության մարմիններն իրավունք են ունեցել տվյալ դեպքում գործելու իրենց հայեցողությամբ: