Բուքինգհեմյան պալատը թագուհու 90-ամյակի առթիվ 3 ուշագրավ լուսանկար է հրապարակել (լուսանկարներ)

Բուքինգհեմյան պալատը Մեծ Բրիտանիայի թագուհու 90-ամյակի առիթով այսօր հրապարակել է ամերիկացի հայտնի լուսանկարիչ Էնի Լեյբովիցի կողմից անցած ամիս արված լուսանկարը, որում թագուհին իր հինգ ծոռներով և երկու փոքր թոռներով է շրջապատված։ Այս լուսանկարն իր լուսավորությամբ և կոմպոզիցիայով անցյալի նշանավոր արքայական կտավներն է հիշեցնում, գրում է The Daily Mail-ը:

Այսօր հրապարակված մյուս պաշտոնական լուսանկարում թագուհին կանգնած է Վինձորի ամրոցում իր չորս շների հետ, իսկ երրորդ լուսանկարում՝ նստած է իր միակ դստեր՝ Աննա արքայադստեր կողքին։

Այսօր լրանում է Մեծ Բրիտանիայի թագուհի Էլիզաբեթ II-ի ծննդյան 90-ամյակը։ Նա բրիտանական գահին է 1952 թվականից և պատմության մեջ ամենաերկար իշխող բրիտանացի միապետն է։

Թագուհու ծննդյան առիթով Մեծ Բրիտանիայում կանցկացվեն տարբեր տոնական միջոցառումներ, իսկ Էլիզաբեթ II-ն իր 94-ամյա ամուսին արքայազն Ֆիլիպի հետ կզբոսնի Վինձորի զբոսայգում: Այնուհետև նա կվառի միապետի ծննդյան առիթով վառվող 1000 փարոսներից առաջինը։

Հաղորդվում է, որ երեկոն Էլիզաբեթ II-ը մտադիր է անցկացնել ընտանեկան շրջապատում: