ԵԽԽՎ-ն բանաձև է ընդունել «Սավչենկոյի պատժամիջոցային ցուցակը» հրապարակելու մասին

ԵԽԽՎ-ն ձայների մեծամասնությամբ բանաձև է ընդունել, որով առաջարկել է  ընդունել «Սավչենկոյի պատժամիջոցային ցուցակը»:

РИА Новости-ի հաղորդմամբ` ցուցակում առաջարկվում է ներառել ուկրաինուհի օդաչու Նադեժդա Սավչենկոյի ձերբակալության և դատավճռի կայացման գործում ներգրավված անձանց: Բանաձևում նաև ասվում է, որ ցուցակը պետք է ուժի մեջ մտնի, եթե «Սավչենկոն անհապաղ ազատ չարձակվի»:

ԵԽԽՎ-ն ողջունել է Լիտվայի կողմից ընդունված «Սավչենկոյի ցուցակը», որում ներառվել է 46 մարդ:

Բացի այդ, «Սավչենկոյի ցուցակ» է ստեղծվել Ուկրաինայում: Դրանում 84 մարդու անուն է ներառվել, որոնց թվում են ՌԴ Քննչական հանձնաժողովի նախագահ Ալեքսանդր Բաստրիկինը, Անվտանգության դաշնային ծառայության ղեկավար Ալեքսանդր Բորտնիկովը, դատախազ Նատալյա Պոկլոնսկայան:

Ուկրաինայի նախագահ Պյոտր Պորոշենկոն կոչ է արել ԱՄՆ-ին և Եվրոպայի երկրներին միանալ այդ ցուցակին:

Ինչպես հաղորդել էինք նախօրեին` նման ցուցակ պատրաստվում է նաև Էստոնիայում: