Արևային էներգիայով աշխատող Solar Impulse 2 ինքնաթիռը վերսկսել է իր շուրջերկրյա ճամփորդությունը

01:13 • 22.04.16

Արևային էներգիայով աշխատող Solar Impulse 2 ինքնաթիռը հինգշաբթի վերսկսել է իր շուրջերկրյա ուղևորությունը կոտրված մարտկոցի պատճառով երկարատև դադար տալուց հետո:

Ինչպես գրում է BBC-ն, ինքնաթիռը երկինք է բարձրացել Հոնոլուլուի օդանավակայանից և ուղևորվում է Կալիֆոռնիա: Ինքնաթիռի օդաչուն է շվեյցարացի Բերտրան Պիկարը, ով փոխարինել է շուրջերկրյա ճամփորդության առաջին մասում ինքնաթիռը վարած Անդրե Բորշբերգին:

Ճամփորդության ընթացքում սա ինքնաթիռի 9-րդ թռիչքն է: Solar Impulse 2-ը Խաղաղ օվկիանոսով ուղևորությունը մեկնարկել է մեկ տարի առաջ:

Թռիչքի ընթացքն ամեն րոպե վերահսկում է Մոնակոյի ավիակարգավարը: Օդերևութաբանները և կազմակերպիչները մշտապես թարմացնում են տեղեկատվությունը` հարմար երթուղի ընտրելով օդանավի համար: