Մոսկվայում ահաբեկչությունների պատրաստման մեջ կասկածվող անձինք մտադիր են եղել կրակել անցորդների վրա

Ռուսաստանի Դաշնության անվտանգության դաշնային ծառայության աշխատակիցների կողմից ձերբակալված անձինք, որոնք կասկածվում են Մոսկվայում ահաբեկչությունների պատրաստման մեջ, մտադիր են եղել մայիսյան տոների ժամանակ կրակել անցորդների վրա: Այդ մասին հաղորդում է РИА Новости-ն՝ վկայակոչելով իրավապահ մարմիններում իր աղբյուրներին:

Այդ տեղեկությունը պաշտոնապես դեռ չի հաստատվել:

ՌԴ անվտանգության դաշնային ծառայությունը մայիսի 4-ին հայտնել է, որ Մոսկվայում ձերբակալվել է Կենտրոնական Ասիայից ժամանած մի քանի անձ, որոնք պատրաստվում էին ահաբեկչությունների շարք կազմակերպել մայիսյան տոների ժամանակ: Նրանց մոտ հայտնաբերվել են զենք և պայթուցիկ նյութեր:

Ծառայությունը հայտնել է, որ նրանք ահաբեկչություններ էին պատրաստում «Սիրիայի և Թուրքիայի տարածքում գործող միջազգային ահաբեկչական կազմակերպությունների ղեկավարների հանձնարարականով»։