ՀՀ և ԱՀ ԱԳ նախարարները մտքեր են փոխանակել զինադադարի խախտումների հետաքննության մեխանիզմի ստեղծման շուրջ

Մայիսի 10-ին արտգործնախարար Էդվարդ Նալբանդյանը հանդիպել է Արցախի ԱԳ նախարար Կարեն Միրզոյանին:

Այս մասին հայտնում են ՀՀ ԱԳՆ լրատվական ծառայությունից։

Զրուցակիցները քննարկել են Ադրբեջանի կողմից Արցախի դեմ սանձազերծված լայնածավալ ռազմական ագրեսիվ գործողությունների հետևանքերի վերացմանն ուղղված քայլերը։ Այս համատեքստում մտքեր են փոխանակվել 1994-1995թթ. զինադադարի հաստատման և ամրապնդման եռակողմ անժամկետ համաձայնագրերի անվերապահ կատարման, զինադադարի խախտումների հետաքննության մեխանիզմի ստեղծման շուրջ։

Էդվարդ Նալբանդյանն ու Կարեն Միրզոյանն անդրադարձել են Հայաստանի և Արցախի արտգործնախարարությունների միջև համագործակցության հարցերին։