Բրյուսելում ահաբեկչության հետևանքները կարող էին ավելի սարսափելի լինել. The Wall Street Journal

Բրյուսելում ահաբեկչությունները կարող էին ավելի մեծ թվով զոհերի հանգեցնել, եթե չլինեին մի շարք պատահականություններ՝ կապված նաև ահաբեկիչների գործողությունների հետ, գրում է The Wall Street Journal թերթը՝ վկայակոչելով հետաքննությանը մոտ աղբյուրների:

Բրյուսելի միջազգային օդանավակայանում մարտի 22-ի առավոտյան երկու պայթյուն էր հնչել: Երրորդ պայթյունը տեղի էր ունեցել քիչ ժամանակ անց՝ մետրոյի «Մալբեկ» կայարանում՝ գնացքի վագոնում: Ահաբեկչությունների հետևանքով մահացել է 32 մարդ, ավելի քան 300 հոգի ստացել է տարբեր աստիճանի վնասվածքներ: Ահաբեկչության պատասխանատվությունը ստանձնել է «Իսլամական պետություն» ահաբեկչական խմբավորումը:

Թերթի զրուցակիցների տվյալներով՝ ավելի լուրջ հետևանքներից հաջողվել է խուսափել բախտի, ահաբեկչություններից օրեր առաջ ոստիկանության լավ աշխատանքի և ահաբեկչական խմբի ներսում շփոթության շնորհիվ: Բացի այդ, ահաբեկիչներից մեկն օդանավակայանում գցել է ռումբով ճամպրուկն ուղեբեռի սայլակից, ինչի պատճառով պայթյունի ուժգնությունն այնքան մեծ չի եղել, որքան նախատեսվում էր, իսկ մյուսը թողել է պայթուցիկով պայուսակը՝ այն գործի չդնելով: