Հիլարի Քլինթոնը պատմել է, թե ինչ դերակատարություն կունենա ամուսինը՝ նախագահի պաշտոնում իր ընտրվելու դեպքում

ԱՄՆ նախագահի պաշտոնին հավակնող դեմոկրատ թեկնածու Հիլարի Քլինթոնը հայտարարել է, որ հաղթանակի դեպքում իր ամուսնուն՝ նախկին նախագահ Բիլ Քլինթոնին, թույլ կտա զբաղվել «տնտեսության աշխուժացմամբ», հաղորդում է ABC News-ը։

«Իմ ամուսնուն ես պատրաստվում եմ նշանակել տնտեսության աշխուժացման գծով պատասխանատու, քանի որ դուք գիտեք, որ նա գիտի, թե ինչպես դա անել»,-ասել է Քլինթոնը։

Նա վստահություն է հայտնել, որ Բիլ Քլինթոնի գիտելիքներն օգտակար կլինեն հատկապես ԱՄՆ-ի արևելյան շրջաններում ու այն վայրերում, որոնց նախկինում ուշադրություն չի դարձվել։

Քլինթոնը շարունակում է դեմոկրատների նախընտրական արշավի առաջատարը մնալ։ Առաջիկա համագումարին նա կարող է ակնկալել 2.239 պատվիրակների աջակցությունը, մինչդեռ նրա մրցակից Բեռնի Սանդերսը՝ 1.458-ինը։

Բիլ Քլինթոնն ԱՄՆ նախագահի պաշտոնը զբաղեցրել է 1993-2001 թվականներին։ Վերջին շրջանում նա հասարակական-քաղաքական աշխատանքով է զբաղվում։