«Առնական» Միշել Օբաման ու կանացի Մելանիա Թրամփը. ծաղրանկարիչը համեմատել է կանանց և հայտնվել սկանդալի կենտրոնում (լուսանկար)

Ծաղրանկարիչ Բեն Գարիսոնն իր ծաղրանկարի պատճառով հայտնվել է սկանդալի կենտրոնում. նա ԱՄՆ առաջին տիկին Միշել Օբամային պատկերել է կոպիտ ու ջղային՝ ԱՄՆ նախագահի հանրապետական թեկնածու Դոնալդ Թրամփի կնոջ կողքին, որը պատկերվել է կանացի և նուրբ։    

Ծաղրանկարը բնորոշվել է «ռասիստական և կնատյաց», գրում է The Daily Mail-ը:

Բեն Գարիսոնը նկարը հրապարակել էր Twitter-ի իր էջում ուրբաթ օրը՝ գրելով. «Առաջին տիկինը կրկին հիանալի կլինի, Թրամփ- 2016»։

Twitter-ի օգտատերերն անմիջապես զայրույթով են արձագանքել նկարին, և տասնյակ մարդիկ սկսել են պաշտպանել ԱՄՆ առաջին տիկնոջը: Օգտատերերից մեկը գրել է. «Անկեղծ ասած՝ սա չափազանց ռասիստական է և վերադառնում է այն կարծրատիպերին, որ սևամորթ կանայք ջղային են և առնական»։

Մեկ այլ օգտատեր գրել է. «Միշելը գեղեցիկ է և հիանալի: Եվ ոչ միայն, նա նաև շատ լավ անձնավորություն է»: