Զիկա վիրուսն ամռանը կարող է տարածվել Եվրոպայում. ԱՀԿ

Զիկա վիրուսն այս ամառ կարող  է տարածվել Եվրոպայում, թեև հիվանդության լուրջ բռնկման վտանգն այնքան էլ մեծ չէ: BBC-ի փոխանցմամբ` այս մասին հայտարարել է Առողջապահության համաշխարհային կազմակերպությունը:

ԱՀԿ-ի տվյալներով` վիրուսի տարածման ամենամեծ վտանգի տակ են գտնվում Սև ծովի ափամերձ շրջանները Ռուսաստանում և Վրաստանում, ինչպես նաև՝ Մադեյրա կղզին:

Վիրուսի տարածման վտանգը չափավոր է համարվում Ֆրանսիայում, Իսպանիայում, Իտալիայում և Հունաստանում: 

ԱՀԿ-ն կոչ է անում երկրների իշխանություններին վերացնել այն վայրերը, որտեղ կարող են բազմանալ մոծակներն ու հիվանդության բացասական հետևանքների մասին տեղեկացնել բնակչությանը, հատկապես` հղի կանանց:

Սկզբնական շրջանում կարծում էին, որ վիրուսը տարածվում է Aedes aegypti տեսակի մոծակի խայթոցի միջոցով, սակայն ավելի ուշ պարզվեց, որ այն տարածվում է նաև այլ ուղիներով:

Բրազիլացի գիտնականների ուսումնասիրությունների համաձայն` Զիկա վիրուսի համաճարակի բռնկման վտանգի ենթակա շրջաններում, ընդհանուր առմամբ, 2.2 մլրդ մարդ է բնակվում: