Վակուումային գերարարգ գնացքում պատուհանների փոխարեն 3D էկրաններ կտեղադրվեն (տեսանյութ)

Ամերիկյան Hyperloop Transportation Technologies ընկերությունը, որը  Hyperloop One խմբի հետ զուգահեռ վակուումային գնացք է մշակում, ներկայացրել է վագոնի նախատիպը:

Ինչպես ներկայացնում Motor.ru-ն, նորարար վագոնում պատուհանների փոխարեն էկրաններ են տեղադրված, որոնց վրա կարելի է 3D պատկերներ կամ երթևեկության մասին տեղեկատվություն ցուցադրել: 

Hyperloop նախագիծը ենթադրում է, որ գնացքը կընթանա փակ խողովականման տարածքով, և ուղևորները չեն կարողանա տեսնել` ինչ է կատարվում դրսում: Իսկ էկրաններին հնարավոր կլինի պատկերել ցանկացած տեսարան, օրինակ` բնապատկեր: Էկրանների վրա նաև զանազան տեղեկություններ կհեռարձակվեն, ինչպես օրինակ` շարժման արագությունը կամ ջերմաստիճանը:

Hyperloop-ի գաղափարն առաջին անգամ 2013-ին առաջարկել էր ամերիկացի միլիարդատեր, Tesla Motors և SpaceX ընկերությունների հիմնադիր Էլոն Մասկը:

Hyperloop One-ը այս ամիս բացօթյա տարածությունում փորձարկել է վակուումային գնացքի արագացման համակարգը: Մինչև տարեվերջ կսկսվեն փորձարկումներն արդեն վակուումային խողովակում: Սեղմված օդի և ցածր ճնշման հաշվին գնացքը կկարողանա մինչև 1200 կմ/ժամ արագություն զարգացնել: