Թրամփի կողմնակիցների ու հակառակորդների ցույցերը վերաճել են անկարգությունների ու ոստիկանների հետ բախումների (տեսանյութ)

Ամերիկյան Սան Դիեգո քաղաքում Հանրապետական կուսակցությունից ԱՄՆ նախագահի թեկնածու Դոնալդ Թրամփի կողմնակիցների ու հակառակորդների ցույցերը վերաճել են զանգվածային անկարգությունների և ոստիկանների հետ բախումների:

Ոստիկանությունը որոշել է ուժ գործադրել ցուցարարների նկատմամբ այն բանից հետո, երբ երկու հակամարտող ճամբարների անդամները սկսել են վիճաբանել, այնուհետև միմյանց վրա ձվեր և շշեր են նետել:

Իրավապահ մարմինների աշխատակիցները մտել են ամբոխի մեջ և փորձել բաժանել նրանց, սակայն ցուցարարները սկսել են ուժ կիրառել նրանց նկատմամբ: Դրան ի պատասխան` ոստիկաններն արցունքաբեր գազ են բաց թողել, իսկ նրանց, ովքեր ավելի ագրեսիվ են իրենց պահել, ծեծել են մահակներով և ձերբակալել:

San Diego Union Tribune-ի համաձայն՝  առնվազն 10 մարդ է ձերբակալվել, 18-ն էլ՝ տուժել, նրանց բժշկական օգնություն է պահանջվել: