Արկադի Ղուկասյանին «ընդհանրապես չի հետաքրքրում» իր դեմ մահափորձ իրականացրած Սամվել Բաբայանի վերադարձը

Այսօր Հայաստանի Հանրապետության նախկին վարչապետ Անդրանիկ Մարգարյանի ծննդյան հիշատակը հարգելու էր եկել նաև ԼՂՀ նախկին նախագահ, ՀՀ հատուկ հանձնարարություններով դեսպան Արկադի Ղուկասյանը:

Հիշեցնենք, որ ԼՂՀ պաշտպանության բանակի նախկին հրամանատար Սամվել Բաբայանը տարիներ առաջ մեղադրվում էր նրա դեմ մահափորձ կազմակերպելու մեջ:

Այսօր Tert.am-ի հարցին, թե ինչպե՞ս է գնահատում Սամվել Բաբայանի վերադարձը, Ղուկասյանը պատասխանեց. «Ինձ էդ հարցը ընդհանրապես չի հետաքրքրում»: Թե ինչու չի հետաքրքրում, Ղուկասյանն ասաց. «Դե, ձեզ հետաքրքրում է, ինձ չի հետաքրքրում»:

Լրագրողները հետաքրքրվեցին, թե Ղուկասյանը հավակնո՞ւմ է ԼՂՀ հաջորդ նախագահի պաշտոնին, քանի որ նման խոսակցություններ են շրջանառվում: «Դա անլուրջ խոսակցություն է, որովհետև դրա մասին, ընդհանրապես, խոսք չի եղել»,-հայտարարեց ԼՂՀ նախկին նախագահը: Հստակեցմանը, թե արդյոք չունի որևէ ցանկություն այդ պաշտոնի հետ կապված, ասաց. «Ես ունեմ շատ ցանկություններ, բայց այդ պաշտոնի մասին, ընդհանրապես, չեմ մտածել: Ես համարում եմ, որ երկու անգամ նույն գետը մտնելը երևի էդքան էլ ճիշտ չի»:

Tert.am-ի հարցին, թե հնարավոր է իրեն այլ պաշտոն են խոստացել Հայաստանում, ասաց. «Ընդհանրապես ինձ որևէ մեկը պաշտոն չի խոստացել: Առաջին հերթին ես պիտի էդ ցանկությունն ուենենամ»:

Լրագրողները հետաքրքրվեցին նաև, թե ինքը կո՞ղմ է Ղարաբաղի սահմանադրական բարեփոխումներին: «Էդ հարցն ուղղեք Ղարաբաղի ղեկավարությանը: Ես համարում եմ, որ դա Ղարաբաղի ժողովրդի և իշխանության խնդիրն է»,-ասաց ԼՂՀ նախկին նախագահը: