Անկարան չի ափսոսում խոցված ռուսական ռմբակոծիչի հետ կապված միջադեպի համար, բայց վշտացած է. թուրք նախարար

Թուրքիայի էկոնոմիկայի նախարար Նիհաթ Զեյբեքչին հայտարարել է, որ Թուրքիան չի ափսոսում անցած տարի խոցված ռուսական ռմբակոծիչի հետ կապված միջադեպի համար, բայց «վշտացած է» այդ առնչությամբ, հայտնում է Hurriyet Daily News-ը:

«Մենք ափսոսանք չենք զգում, բայց վշտացած ենք: Նրանք (ռուսական կողմը- Խմբ.) նույնպես պետք է վշտացած լինեն: Մենք ենթադրում ենք, որ նրանք նաև վշտացած են թուրքական օդային տարածքը մտադրված խախտելու առիթով»,- հայտարարել է նախարարը:

Զեյբեքչիի խոսքով՝ Ռուսաստանն այս իրավիճակում սխալ է եղել, քանի որ իր ինքնաթիռը մնացել է Թուրքիայի օդային տարածքում «13 կամ 14 րոպե»՝ չնայած օդաչուին ուղղված «բազմաթիվ նախազգուշացումներին»:

Նախարարը նշել է, որ Մոսկվայի և Անկարայի միջև կոնֆլիկտը բացասական հետևանքներ է ունեցել երկու կողմերի համար էլ, և առավել խելամիտ ելքն այդ իրավիճակում «հարաբերությունները հնարավորինս շուտ կարգավորելն է»:

Հիշեցնենք, որ Թուրքիայի և ՌԴ-ի հարաբերությունները սրվել են թուրք-սիրիական սահմանին ռուսական Սու-24 ինքնաթիռի խոցումից հետո: Ռուսաստանը պատժամիջոցներ է սահմանել Թուրքիայի նկատմամբ՝ արգելելով այդ երկրից մի շարք սննդամթերքների, թռչնամսի, մրգերի ներմուծումը, ինչպես նաև սահմանափակել է ռուս զբոսաշրջիկների՝ Թուրքիայի հանգստավայրեր այցելելու հնարավորությունը։