Սիրիացի ապստամբները կրակ են բացել Հալեպի քրդական թաղամասում. կան զոհեր ու վիրավորներ

Սիրիայի Հալեպ քաղաքի մոտակայքում շաբաթ առավոտյան ապստամբները կրակ են բացել քրդական «Ժողովրդական ինքնապաշտպանության ջոկատների» (YPG) աշխարհազորայինների հսկողության տակ գտնվող բնակավայրում, ինչի հետևանքով առնվազն 7 մարդ է մահացել:

Ինչպես հաղորդում է Reuters  գործակալությունը` մեջբերելով Մարդու իրավունքների սիրիական դիտորդական կենտրոնի տվյալները, ևս 40 մարդ վիրավորվել է Շեյխ Մաքսուդ քրդական թաղամասում իրականացված ռմբակոծության հետևանքով:

Կենսական նշանակություն ունեցող ճանապարհի վրա շաբաթներ շարունակվող ռմբակոծությունն ու ավիահարվածները անելանելի վիճակի և շրջափակման մեջ են դրել Հալեպի հարյուր հազարավոր բնակիչների:

 Հարյուրավոր մարդիկ են զոհվել Հալեպում`  փետրվարին հաստատված հրադադարի ապրիլյան խախտումից հետո: