Ապրիլյան պատերազմում վիրավորված երկու զինծառայողի պրոթեզավորման հարցը լուծվել է, սոցիալական խնդիրները՝ ոչ

22:12 • 20.06.16

Ապրիլյան պատերազմի ընթացքում Թալիշում վիրավորված ժամկետային զինծառայող Նորայր Զախարյանի առողջական իրավիճակը կայունացել է, ձախ ոտքը կորցրած զինվորն էլ ընտելանում է պրոթեզին: Այս մասին Tert.am-ի հետ զրույցում ասաց Նորայր Զախարյանի մայրը՝ Գայանե Զախարյանը:

«Վերքն է մի քիչ ցավում, բայց ոչինչ, կսովորի, պրոթեզավորումն արվել է մեկ շաբաթ առաջ, ժամանակ է անհրաժեշտ»,-ասաց տիկին Զախարյանն ու ասաց, որ քառօրյա պատերազմից հետո Նորայր Զախարյանի հոգեվիճակը փոխվել է:

Տիկին Զախարյանի խոսքով՝ Նորայրին անհանգստացնող միակ խնդիրը այժմ սոցիալական ծանր պայմաններն են։

«Սոցիալական խնդիր ունենք, որդիս նեղվում է: Մեր ընտանիքում ոչ ոք չի աշխատում, աղջիկս առաջին կարգի հաշմանդամ է, տղաս էլ հաշմանդամության կարգ կստանա, իսկ մենք՝ ես ու ամուսինս չենք աշխատում»,-ասաց նա:

Ինչ վերաբերում է հաշմանդամության կարգի որոշմանն ու ՀՀ աշխատանքի և սոցիալական հարցերի նախարարության կողմից թոշակ ստանալուն, տիկին Զախարյանն ասաց, որ փաստաթղթերի հետ կապված խնդիրներ կան, ինչից հետո որդին հաշմանդամության կարգ կստանա:

Ապրիլյան պատերազմի հետևանքով ստորին վերջույթները կորցրած 19-ամյա կրտսեր սերժանտ Դավիթ Գրիգորյանն էլ դեռ սպասում է իր պրոթեզավորմանը: Tert.am-ի հետ զրույցում Դավիթ Գրիգորյանի մայրը՝ Արմենուհի Գրիգորյանն ասաց, որ պատրաստվում են որդու պրոթեզավորմանը, որը տեղի է ունենալու հինգշաբթի։

 

 
«Դավիթի վիճակը լավանում է, չափերը վերցրել են, հինգշաբթի առավոտյան կանչել են հիվանդանոց, որպեսզի պրոթեզավորումը տեղի ունենա»,-ասաց նա:

Տիկին Արմենուհին հայտնեց, որ Դավիթին, բացի առողջական վիճակից անհանգստացնում է նաև սոցիալական պայմանները. «Տան պայմաններն անհանգստացնող են, ընդամենը 100 հազ. դրամ պետական աջակցություն ենք ստացել, սպասում ենք փաստաթղթերի կարգավորմանը, որպեսզի հաշմանդամության թոշակ նշանակվի: Զգալի չափով ֆինանսական աջակցություն ստացել ենք նաև մասնավոր ընկերություններից ու անհատներից»,-ասաց տիկին Արմենուհին՝ հավելելով, որ բուժման ողջ ծախսերը հոգում է Պաշտպանության նախարարությունը:

Հիշեցնենք, որ ըստ Պաշտպանության նախարարության պաշտոնական հաղորդագրությունների՝ ժամկետային զինծառայող Նորայր Զախարյանը վիրավորվել էր Թալիշում ականապատման իրականացման ժամանակ, իսկ պաշտպանական գծի առաջնագծում մարտի 30-ին վիրավորվել էր ժամկետային զինծառայող Դավիթ Գրիգորյանը՝ ականի պայթյունի հետևանքով կորցնելով ստորին վերջույթները: