ԵՄ-ի և Ուկրաինայի միջև վիզային ռեժիմի ազատականացումը տեղի կունենա մինչև ամառ. Յունկեր

Եվրամիության և Ուկրաինայի միջև վիզային ռեժիմի ազատականացումը տեղի կունենա մինչև 2017 թվականի ամառ: Այդ մասին հայտնել է Եվրահանձնաժողովի նախագահ Ժան-Կլոդ Յունկերը, հայտնում է interfax.ru-ն:

«Մենք քննարկել ենք վիզային ազատականացման հարցը, դա տեղի կունենա մինչև ամառ»,- ասել է Յունկերն Ուկրաինայի վարչապետ Վլադիմիր Գրոյսմանի հետ հանդիպման արդյունքներով ճեպազրույցի ժամանակ:

ԵՄ-ի հետ վիզային ռեժիմի ազատականացումը Կիևի արտաքին քաղաքականության գլխավոր նպատակներից է: Ուկրաինայի նախագահ Պյոտր Պորոշենկոն բազմիցս հանդես է եկել հայտարարություններով, որ մոտ ժամանակներս երկրի քաղաքացիներին կտրամադրվի առանց վիզայի ռեժիմ, բայց Եվրամիությունում մինչ այժմ չեն կայացրել այդ որոշումը:

Փետրվարի 2-ին Եվրոպական խորհրդարանի պատգամավորները քվեարկել են Վրաստանի հետ վիզային ռեժիմի վերացման օգտին: Ուժի մեջ մտնելու համար Վրաստանի համար առանց վիզայի ռեժիմը պետք է հաստատի ԵՄ խորհուրդը: