Վենեսուելայի նախագահը հայտարարել է, որ նրա դեմ դավադրություն էր պատրաստվում

10:48 • 13.04.17

Վենեսուելայի նախագահ Նիկոլաս Մադուրոն հայտարարել է օրերս Սան Ֆելիքս քաղաք այցելության ժամանակ նրա դեմ դավադրություն կազմակերպելու փորձի մասին, հայտնում է «ՌԻԱ Նովոստի»-ն:


Ավելի վաղ հաղորդվել է, որ ցուցարարները տարբեր իրեր են նետել Մադուրոյի մեքենայի վրա և նրա հասցեին վիրավորական արտահայտություններ բացականչել, երբ նա ռազմական ջիպով շրջել է Սան Ֆելիքսում և ողջունել իր կողմնակիցներին:


«Որոշ անձինք այնտեղ խելագարվեցին՝ հիմարություններ ասելով, նրանք դավադրություն էին պատրաստում, և ժողովուրդը թույլ չտվեց դա կազմակերպել»,- ասել է Մադուրոն:


Երկրի նախագահը շնորհակալություն է հայտնել իրեն փրկողներին սիրո և աջակցության համար: Նա հիշեցրել է նաև ժամանակին նախագահի պաշտոնը զբաղեցնող Ուգո Չավեսի դեմ պետական հեղաշրջման փորձի մասին, որն ավարտվել էր անհաջողությամբ: «Դա նույն մարդիկ են, նրանք նույն նպատակներն ունեն, և կա նույն ժողովուրդը, որը նրանց դիմակայում է և հաղթում նրանց»,- նշել է Վենեսուելայի նախագահը:


Վենեսուելայում ճգնաժամը խորացել է ընդդիմադիր խորհրդարանի աշխատանքի մեկնարկից հետո, քանի որ օրենսդիր և գործադիր իշխանությունների միջև աշխատանքային համագործակցությունն ամբողջովին բացակայում է:


Անցած ամսվա վերջին Վենեսուելայի Գերագույն դատարանը հայտարարել էր, որ ստանձնում է երկրի օրենսդիր իշխանության լիազորությունները՝ Ազգային ասամբլեայի փոխարեն:


«Քանի դեռ շարունակվելու է անհարգալից վերաբերմունքը գործադիր իշխանության նկատմամբ և Ազգային ասամբլեայի կողմից անվավեր որոշումների կայացումը, դատական մարմինը երաշխավորում է, որ անմիջականորեն կկատարի խորհրդարանական պարտականությունները` իրավարար պետության պահպանման համար»,- ասված էր Գերագույն դատարանի հաղորդագրության մեջ:


Ավելի ուշ Գերագույն դատարանը, հետևելով Վենեսուելայի անվտանգության խորհրդի կոչին, չեղարկել է խորհրդարանի լիազորություններն ստանձնելու մասին որոշումը: