«Էտելը սարքել են ծառերի հատում». Դավթաշենում ծառ կտրելու մեջ մեղադրվողի պաշտպանը կդիմի Վերաքննիչ դատարան
Երևանի «Դավթաշեն» վարչական շրջանում ծառեր հատելու մեջ մեղադրվող Ալեքսան Սամսոնյանի պաշտպանը կդիմի Վերաքննիչ դատարան՝ բողոքարկելու Աջափնյակ և Դավթաշեն վարչական շրջանների ընդհանուր իրավասության դատարանի՝ իր պաշտպանյալի կալանավորման մասին որոշումը:
Այս մասին Tert.am-ի հետ զրույցում ասաց Ալեքսան Սամսոնյանի պաշտպան Արմեն Մելքոնյանը:
«Իմ պաշտպանյալը չի ընդունում իրեն առաջադրված մեղադրանքը, բացի այդ՝ առաջին ատյանի դատարանի կայացրած կալանավորման որոշումն անհիմն է: Դրա մեջ հիմնավոր կասկածը բացակայում է»,-ասաց պաշտպանը:
Նրա խոսքով՝ բացակայում են Քրեադատավարական օրենսգրքի 135-րդ հոդվածով նախատեսված արարքները. «Այսինքն՝ նա կթաքնվի, կխոչընդոտի նախաքննությանը և այլն, այդ ամենն իմաստազուրկ է: Վարույթն իրականացնող մարմինը ձևականորեն է գործել, որևէ հիմք չկա, որ իմ պաշտպանյալը դա կանի»:
Որպես ապացույց այդ ամենի պաշտպանը նշում է այն, որ իր պաշտպանյալը հայտնի է, ունի մշտական բնակության վայր, ունի չորս երեխա, որից երեքն անչափահաս են, մի քանի հազար ծառ է տնկել. «Թյուրիմացություն է տեղի ունեցել, էտելը սարքել են ծառերի հատում»:
Հիշեցնենք, որ Ալեքսան Սամսոնյանին մեղադրանք է առաջադրվել ՀՀ ՔՕ-ի 296-րդ հոդվածի 3-րդ մասի հատկանիշներով, այն է՝ ծառերի, թփերի և բուսածածկի ապօրինի հատումը խոշոր վնաս պատճառելով: Արարքը պատժվում է տուգանքով՝ նվազագույն աշխատավարձի վեցհարյուրապատիկից հազարապատիկի չափով, կամ կալանքով՝ առավելագույնը երեք ամիս ժամկետով, կամ ազատազրկմամբ` առավելագույնը երկու տարի ժամկետով` որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով՝ առավելագույնը երեք տարի ժամկետով կամ առանց դրա:










