Լատինական Ամերիկայի երկրները խնդրում են Վենեսուելայի նախագահին ընտրություններ անցկացնել
Լատինամերիկյան 11 երկրների արտգործնախարարություններ դիմել են Վենեսուելայի նախագահ Նիկոլաս Մադուրոյին՝ խնդրելով երկրում ընտրություններ անցկացնել տնտեսական ճգնաժամին վերջ դնելու համար, հայտնում է BBC-ի ռուսական ծառայությունը:
«Մենք կոչ ենք անում Վենեսուելայի Բոլիվարյան Հանրապետության կառավարությանը հնարավորինս շուտ որոշել ընտրությունների ամսաթիվը, ինչը թույլ կտար լուծում գտնել լուրջ ճգնաժամի համար, որում գտնվում է երկիրը»,- ասված է հայտարարությունում:
«Մենք կոչ ենք անում իշխանություններին երաշխավորել խաղաղ հավաքների իրավունքը, ինչպես դա պահանջում է Սահմանադրությունը»,- ասված է տեքստում: «Մենք նաև կոչ ենք անում ընդդիմությանը, օգտվելով այդ իրավունքից, հիշել պատասխանատվության մասին»,- նշվում է փաստաթղթում:
Դիմումը ստորագրել են Արգենտինայի, Բրազիլիայի, Չիլիի, Կոլումբիայի, Կոստա Ռիկայի, Մեքսիկայի, Գվատեմալայի, Հոնդուրասի, Պարագվայի, Ուրուգվայի և Պերուի ԱԳՆ-ների ներկայացուցիչները:
Վենեսուելայում ճգնաժամը խորացել է ընդդիմադիր խորհրդարանի աշխատանքի մեկնարկից հետո, քանի որ օրենսդիր և գործադիր իշխանությունների միջև աշխատանքային համագործակցությունն ամբողջովին բացակայում է:
Անցած ամսվա վերջին Վենեսուելայի Գերագույն դատարանը հայտարարել էր, որ ստանձնում է երկրի օրենսդիր իշխանության լիազորությունները՝ Ազգային ասամբլեայի փոխարեն:
«Քանի դեռ շարունակվելու է անհարգալից վերաբերմունքը գործադիր իշխանության նկատմամբ և Ազգային ասամբլեայի կողմից անվավեր որոշումների կայացումը, դատական մարմինը երաշխավորում է, որ անմիջականորեն կկատարի խորհրդարանական պարտականությունները` իրավարար պետության պահպանման համար»,- ասված էր Գերագույն դատարանի հաղորդագրության մեջ:
Ավելի ուշ Գերագույն դատարանը, հետևելով Վենեսուելայի անվտանգության խորհրդի կոչին, չեղարկել է խորհրդարանի լիազորություններն ստանձնելու մասին որոշումը:










