«Լուսավոր Հայաստանը» դիմելու է ՍԴ՝ ՏԻՄ նոր օրենսգրքում հստակություն մտցնելու համար

14:28 • 19.04.17

«Լուսավոր Հայաստան» կուսակցությունը պատրաստվում է դիմել Սահմանադրական դատարան՝ ՏԻՄ նոր օրենսգրքում հստակություն մտցնելու համար:

Tert.am-ի հետ զրուցում «Լուսավոր Հայաստան» կուսակցության Վանաձոր քաղաքի ավագանու ցուցակը գլխավորող Քրիստ Մարուքյանը նշեց, որ օրենքում հակասություններ կան, ինչից օգտվելով  Վանաձորի քաղաքապետը  մի քանի ավագանու նիստ է  հրավիրել:

Մի  դեպքում օրենքով ասվում է, որ նիստն իրավազոր է, երբ նիստին մասնակցում է ավագանու անդամներից կեսից ավելին, մյուս դեպքում էլ իրավազոր, եթե նիստին ներկայանում են որոշումներ ընդունելու համար բավարար թվով ավագանու անդամներ և որոշումներն ընդունվում են ձայների մեծամասնությամբ, բայց ոչ պակաս, քան ավագանու անդամների ձայների 1/4-ի չափով:

«Խախտվում է մեծամասնության սկզբունքը, միանշանակ գումարված  նիստերն իրավազոր չեն, 9 հոգով նիստ չեն կարող հրավիրել»,- շեշտեց նա:

Քրիստ Մարուքյանն ասաց, որ այս պահին աշխատում են հայցադիմումի վրա, հանդես  կգան հայտարարությամբ,  հայցադիմումի համար անհարժեշտ է նաև 27 պատգամավորի ստորագրություն:

Հիշեցնենք, որ նախորդ տարի հոկտեմբերի 2-ին կայացած ընտրություններից հետո «Լուսավոր Հայաստանը», ՀՎԿ-ն և ԲՀԿ-ն բոյկոտում են Վանաձորի ավագանու նիստերը, սակայն արդեն երեք  ավագանու նիստ  գումարվել է, ինչն ընդդիմադիրներն իրավազոր չեն  համարում:

Վանաձորի քաղաքապետ Մամիկոն Ասլանյանն էլ՝ օրենքի հղում անելով, պարբերաբար հայտարարում է, որ նիստերն իրավազոր են: