Ավստրալիան քաղաքացիություն ստանալու նոր կանոններ է սահմանել
Ավստրալիան խստացրել է միգրացիոն օրենսդրությունը՝ բարդացնելով երկրի քաղաքացիություն ստանալու գործընթացը: Այժմ թեկնածուները կհանձնեն անգլերենի և «ավստրալական արժեքների» իմացության լուրջ թեստեր, հայտնում է BBC-ի ռուսական ծառայությունը:
Նոր կանոնների սահմանման մասին հայտարարել է երկրի վարչապետ Մալքոլմ Թերնբուլը:
Քաղաքացիության համար դիմողները նաև պարտավոր կլինեն ներկայացնել երկրում չորս տարի մշտապես բնակվելու ապացույցներ: Նախկինում այդ ժամկետը մեկ տարի էր:
Այս որոշումից երկու օր առաջ Ավստրալիան հայտարարել էր օտարերկրացիներին աշխատանքային վիզայի տրամադրման կանոնները խստացնելու մտադրության մասին:
Թերնբուլը նշել է, որ նորամուծությունները պետք է բերեն ավստրալական հասարակությունում ներգաղթյալների ավելի լավ ինտեգրման: Բացատրելով, թե ինչ են «ավստրալական արժեքները», վարչապետը հիշեցրել է գենդերային հավասարության և կրոնի ազատության մասին:
«Կանանց և երեխաների նկատմամբ հարգանքը հիմնական արժեքն է Ավստրալիայում»,- ընդգծել է Թերնբուլը՝ հավելելով, որ ընտանեկան բռնությունն անընդունելի է:










