Վենեսուելան մասամբ ֆինանսավորել է Թրամփի երդմնակալության արարողությունը. լրատվամիջոցներ

11:28 • 20.04.17

Վենեսուելան իր խոշորագույն նավթային ընկերությունը համարվող PDVSA-ի՝ ԱՄՆ–ում գրանցված և նավթի ու նավթամթերքի վերամշակմամբ զբաղվող Citgo Petroleum դուստր ընկերության միջոցով մասամբ ֆինանսավորել է նախագահ Դոնալդ Թրամփի երդմնակալության արարողությունը:

Ինչպես հայտնում է Associated Press-ը, նվիրատվությունը եղել է կես մլն դոլար ու զգալի գերազանցել է մի շարք խոշոր ամերիկյան ընկերությունների նվիրատվությունների չափը: Հայտնի է, որ Pepsi-ն վճարել է 250.000, իսկ Walmart-ը՝ 150.000 դոլար: Վենեսուելայից բացի, Թրամփի երդմնակալության արարողության համար կես մլն դոլար են նվիրաբերել JP Morgan Chase-ն ու Exxon-ը:

Ավելի վաղ որոշ ամերիկացի սենատորներ Միացյալ Նահանգների ֆինանսների նախարար Սթիվեն Մնուչինին ուղղված նամակում իրենց անհանգստությունն են հայտնել առ այն, որ ռուսական «Ռոսնեֆտ»-ը, հնարավոր է, վերահսկում է Citgo Petroleum-ը:

Պաշտոնյաների ունեցած տեղեկության համաձայն՝ «Ռոսնեֆտ»-ը կարող է էական մասնաբաժին ստանալ Վենեսուելայի խոշորագույն նավթային ընկերությանը՝ PDVSA–ին պատկանող PDV America ընկերությունում, որին էլ պատկանում է Citgo-ն:

Հայտնի է, որ Թրամփը հունվարի 20-ին կայացած երդմնակալության արարողության համար հավաքել էր ռեկորդային 107 մլն դոլար, ինչն ավելի քան կրկնակի գերազանցում է 2009թ. Բարաք Օբամայի առաջին երդմնակալության արարողության համար հավաքված գումարը:

Նշենք, որ Միացյալ Նահանգների ու Վենեսուելայի հարաբերությունները վերջին տարիներին բավականին լարված են: Երկրները հետ են կանչել դեսպաններին, որոնց գործառույթներն այժմ կատարում են գործերի ժամանակավոր հավատարմատարները: