Իտալուհին մոր դին տարիներ շարունակ պահել է տանը՝ նրա թոշակը ստանալու համար

13:57 • 21.04.17

Իտալական Պեշիա քաղաքի 51-ամյա բնակչուհին տարիներ շարունակ թաքցրել է մոր դին, որպեսզի ամեն ամիս ստանա նրա թոշակը:

Ինչպես նշում է italia-ru.com կայքը, խաբեության մասին հայտնի է դարձել, երբ ոստիկանությունը հարևաններից բողոքներ է ստացել կնոջ բնակարանից եկող տարօրինակ հոտի վերաբերյալ:

Իրավապահները, գալով իտալուհու տուն, կարճ ժամանակում հայտնաբերել են 90-ամյա կնոջ դին, որը փտած է եղել:

Աղբյուրը մանրամասնում է, որ դին փաթաթված է եղել ծածկոցով ու դրված աղբի համար նախատեսված պոլիէթիլենային տոպրակների մեջ: Վերջում կինը մոր դին ամրացրել է կպչուն ժապավենով ու պահել խորդանոցի մի անկյունում:

Կինն իրավապահներին խոստովանել է, որ մոր դին թաքցրել է նրա թոշակից չզրկվելու համար: Այժմ իտալուհին կկանգնի դատարանի առաջ: