Գյումրիում փողոցների, տների, օբյեկտների հետ կապված ներդրումներ են լինելու. Սամվել Բալասանյան

18:03 • 21.04.17

Գյումրու քաղաքապետ Սամվել Բալասանյանն այսօր հանդիպել է վարչապետ Կարեն Կարապետյանի հետ: Tert.am-ի հետ զրույցում Սամվել Բալասանյանը, ով դուրս էր գալիս կառավարության շենքից, ասաց, որ վարչապետի հետ քննարկել են մի շարք ներդրումային ծրագրեր:

«2 փողոցների մասով ներդրումներ են լինելու՝ լուրջ ծրագիր է կազմվել դրանց հետ կապված, ներդրումները լինելու են տների, օբյեկտների հետ կապված»,- շեշտեց նա:

Անդրադառնալով խորհրդարանական ընտրություններին՝ Սամվել Բալասանյանն ասաց, որ բնականոն գործընթաց է եղել:

«Ամեն ինչ նորմալ է»,- ասաց նա:

Պատասխանելով դիտարկմանը, որ խորհրդարանում լինելու են նաև Գյումրու նախկին քաղաքապետ Վարդան Ղուկասյանը, և Վարդևան Գրիգորյանը, ով Գյումրու քաղաքապետի թեկնածու է եղել, քաղաքապետի  հիմնական մրցակիցը, Սամվել Բալասանյանն ասաց.

«Դե ի՞նչ ասեմ, եթե մարդիկ ընտրվել են»:

Սամվել Բալասանյանը հրաժարվեց այլ հարցերի պատասխանել, նա շտապեց հեռանալ կառավարության շենքի առջևից, որտեղ բողոքի ակցիա էին իրականացնում  մի շարք տոնավաճառների աշխատակիցներ:

Մանրամասները՝ տեսանյութում։