Ստամբուլում ոստիկանները խոչընդոտել են Ցեղասպանության տարելիցին նվիրված միջոցառման անցկացմանը

13:22 • 24.04.17

Ստամբուլի Շիշլի թաղամասում ոստիկանությունը խոչընդոտել է Հայոց ցեղասպանության 102-րդ տարելիցին նվիրված միջոցառման անցկացմանը, այս մասին հայտնում է Ստամբուլի հայկական պարբերականներից «Ակօսը»:

Թուրքիայի ընդդիմադիր Ժողովրդադեմոկրատական կուսակցության անդամները Շիշլի շրջանի իրենց գլխավոր գրասենյակի մոտ ցանկացել են հիշատակի երթ կազմակերպել, մինչդեռ ոստիկանության միջամտության պատճառով միջոցառումը ստիպված են եղել իրականացնել գրասենյակի ներսում:

«Առերեսվի՛ր ցեղասպանությանը» խորագրով միջոցառմանը մասնակցել են նաև Ստամբուլում գործող «Նոր Զարթոնք» երիտասարդական միության անդամները:

Ժողովրդադեմոկրատներից բացի, միջոցառմանը միացել են Ստամբուլի «Նոր Զարթոնք» հայկական երիտասարդական միության անդամները:

«Նոր Զարթոնք»-ի մամուլի խոսնակ Նորայր Օլգարը թուրք լրագրողների հետ զրույցում նշել է, որ Թուրքիայում ապրող ժողովուրդները պետք է վաղ թե ուշ առերեսվեն իրենց անցյալին, հակառակ պարագայում` այդ հողերում խաղաղություն ակնկալելն իմաստ չի ունենա:

Ժողովրդադեմոկրատական կուսակցության՝ Ստամբուլի Շիշլի շրջանի գրասենյակի ղեկավար Մելիս Թաթանն, իր հերթին, նշել է, որ Ցեղասպանությունը Թուրքիայում 1915-ից ի վեր երբևէ չի ավարտվել:

«Ցեղասպանությունը շարունակվում է նաև այստեղի դպրոցները, փողոցները Թալեաթ փաշայի պատվին անվանակոչելով, Ստամբուլի հայաշատ թաղամասերի պողոտաներին ազգայնական ոճրագործների անուններ տալով: Ցեղասպանությունը շարունակվել է Հրանտ Դինքի, Սևակ Բալըքչըի, Մարիսա Քյուչուքի սպանություններով և նրանց սպանողներին կոծկելով», - ընդգծել է Թաթանը: