Լոս Անջելեսում Ցեղասպանության 102-րդ տարելիցին նվիրված քայլերթին տասնյակ հազարավոր մարդիկ կմասնակցեն. LA Times
Լոս Անջելեսում Հայոց ցեղասպանության 102-րդ տարելիցին նվիրված քայլերթ կանցկացվի, որին, ենթադրաբար, կմասնակցեն տասնյակ հազարավոր մարդիկ:
Ինչպես հայտնում է The Los Angeles Times-ը, քայլերթը կսկսվի Պան Պասիֆիկ այգու մոտից ու կշարունակվի դեպի Թուրքիայի հյուպատոսության շենքը, որի մոտ ակցիայի մասնակիցները Հայոց ցեղասպանության ճանաչման պահանջով հանրահավաք կանցկացնեն:
Աղբյուրը մանրամասնում է, որ հանրահավաքի ժամանակ ելույթ կունենա Լոս Անջելեսի քաղաքապետ Էրիկ Գարսեթին, ինչպես նաև՝ ԱՄՆ Կոնգրեսի Ներկայացուցիչների պալատի անդամ Ադամ Շիֆը:
Ինչպես ավելի վաղ հայտնել էր Tert.am-ը, «Արդարության քայլերթ»-ին իր աջակցությունն է հայտնել Հայոց ցեղասպանության հարցերով հանձնաժողովի հետ համագործակցող 29 կազմակերպություն ու միություն, որոնց անդամները ևս կմասնակցեն միջոցառմանը:
Հավելենք, որ նախորդ տարի քայլերթին մասնակցել էր մոտ 60.000 մարդ:










