Մարդկանց գրկած բերել են քվեարկության. Լ. Զուրաբյանը ՍԴ–ից պահանջեց 3 օրվա ընթացքում ուսումնասիրել ընտրատեղամասերի տեսանյութերը

11:36 • 25.04.17

 Սահմանադրական դատարանում շարունակվում է «Հայ ազգային կոնգրես» -ՀԺԿ դաշինքի դիմումի քննությունը՝ ապրիլի 2-ին տեղի ունեցած խորհրդարանական ընտրությունների քվեարկության արդյունքներն անվավեր ճանաչելու վերաբերյալ:

Անդրադառնալով «Սաս»-ի հայտնի ձայնագրությանը՝ դաշինքի ներկայացուցիչ Լևոն Զուրաբյանն ասաց, որ «Սաս» ընկերության Արտակ Սարգսյանը Ազգային ժողովում չորս տարի շարունակ որևէ բառ չի արտասանել:

«Այս ձայնագրությունը ցույց է տալիս, թե ինչպես են լռության ուխտ պահպանող պատգամավորները վերընտրվում խորհրդարանում»,-ասաց նա և բերեց նաև այլ օրինակներ, երբ վերընտրվել են և արդյունքների առումով «չեմպիոններ են» այն պատգամավորները, որոնք որևէ ընթացակարգում որևէ բան չեն ասել:

«Դուք պատկերացնո՞ւմ եք որևէ ժողովրդավարդական երկիր, որտեղ ռեկորդներ են խփում այն պատգամավորները, որոնք բացարձակապես չեն խոսում, զրո: «Սաս»-ի ձայնագրոթյունը բացատրել է այն, ինչը մենք բոլորս գիտեինք, և ցույց է տալիս որ Հայաստանում ոչ թե ժողովրդավարական ընտրություններ են, այլ պարտադրանք է»,-ասաց նա և նշեց, որ շատ են եղել նաև ուղղորդված դեպքերը:

Դաշինքի ներկայացուցիչ Լևոն Զուրաբյանն, անդրադառնալով ընտրատեղամասերի տեսանյութերի ուսումնասիրությանը, նշեց, որ դրանք ավելի շատ բան են բացահայտում, քան վստահված անձինք:

Դաշինքի ներկայացուցիչը միջնորդությամբ հանդես եկավ և կոչ արեց Սահմանադրական դատարանին հատուկ հանձնախումբ ստեղծել, որը երեք օրվա ընթացքում կուսումնասիրի տեսանյութերը, քանի որ իրենք իրենց ուժերի ներած չափով դա արել են, պարզապես դրանք շատ են և իրենք ի վիճակի չեն:

Լևոն Զուրաբյանի հաջորդ մտահոգությունը հայտարարված արդյունքների անհամապատասխանությունն էր երկրի ժողովրդագրական վիճակի հետ: «Այսպիսի մասնակցության թիվ բռնապետական երկրներում միայն գոյություն ունի, տեսանյութեր կան, որտեղ մարդկանց գրկած բերել են քվեարկության»,- ասաց նա:

Ինչ վերաբերում է ստորագրված ցուցակների հրապարակմանը, ապա Լևոն Զուրաբյանն ասաց, որ դա բավականին աշխատատար գործ է, սակայն իրենք ուսումնասիրում են և խոստացավ մոտ ապագայում հանրությանը ներկայացնել այդ ուսումնասիրության արդյունքները: «Մասնակցության թիվն ուղղակի չի տեղավորվում տրամաբանական, ժողովրդագրական հաշվարկների մեջ»,-ասաց նա: