Ֆրանսիայի նախագահի թեկնածու Մակրոնն անդրադարձել է Ղարաբաղյան հակամարտությանը (տեսանյութ)
Ֆրանսիայի նախագահի թեկնածու, ընտրությունների առաջին փուլում առավելագույն ձայն ստացած «Առաջ» շարժման առաջնորդ, երկրի էկոնոմիկայի նախկին նախարար Էմանուել Մակրոնը, Հայոց ցեղասպանության զոհերի հիշատակին նվիրված արարողության ժամանակ խոսելով լրագրողների հետ, անդրադարձել է Լեռնային Ղարաբաղի հակամարտությանը՝ նշելով, որ ընտրվելու դեպքում ջանքեր կգործադրի խնդրի ուղղությամբ, հայտնում է Nouvelle D'Arménie-ն:
«Լեռնային Ղարաբաղի հակամարտությունը չափազանց բարդ հարց է, որի ուղղությամբ ես ջանքեր կգործադրեմ, բայց որը նույնպես քայլեր է պահանջում: Հասկանալի է, որ Ֆրանսիան չի կարող միայնակ ստանձնել դրա կարգավորման հարցը»,- ասել է Մակրոնը:
Քաղաքական գործիչը նշել է, որ իր ներկայությունն այս արարողությանը նշանակում է «Ֆրանսիայի հայերին և հայկական ծագմամբ ֆրանսիացիներին իր ամբողջական նվիրվածությունը, իր ցանկությունը՝ հասնել ցեղասպանության ճանաչմանը և պահպանել Ֆրանսիայում ցեղասպանության զոհերի հիշատակն ու հայկական մշակույթը»: Ափսոսանք հայտնելով Թուրքիայի բռնած ուղու առնչությամբ՝ նա հաստատել է Հայաստանի հետ «կայուն և բարեկամական հարաբերությունները»:
Ավելի վաղ հաղորդվել է, որ Ֆրանսիայի նախագահի թեկնածու Էմանուել Մակրոնը Փարիզում այցելել է Կանադայի հրապարակում գտնվող Կոմիտասի հուշարձան և հարգանքի տուրք մատուցել Հայոց ցեղասպանության զոհերի հիշատակին:
Մակրոնին ուղեկցել են Ֆրանսիայի հայկական կազմակերպությունների համակարգող խորհրդի համանախագահներ Արա Թորանյանը և Մուրադ Փափազյանը:
Մակրոնը հայտարարել էր, որ նախագահ ընտրվելու դեպքում մտադիր է շարունակել Հայոց ցեղասպանության հիշատակման ավանդույթը և հավելել, որ պետք է շարունակի աշխատել Ցեղասպանության ժխտումը քրեականացնելու ուղղությամբ:










