Պատասխանող կողմն անընդհատ փորձ է անում պնդումները որպես հարցեր ներկայացնել. Լ. Զուրաբյանը՝ ՍԴ-ում
Սահմանադրական դատարանում «Կոնգրես-ՀԺԿ» դաշինքի՝ ապրիլի երկուսին խորհրդարանական ընտրությունները անվավեր ճանաչելու վերաբերյալ դիմումի քննարկմանը Կենտրոնական ընտրական հանձնաժողովի նախագահ Տիգրան Մուկուչյանը ներկայացրեց իր հարցադրումները:
Հարցերից մեկը վերաբերում էր դիմումում նշված փաստերից մեկին, որի համաձայն՝ քվեարկության օրը նույն անձը նույն ժամին քվեարկել է երկու տեղամասում, որոնցից մեկը Երևանում է, մյուսը՝ Շիրակի մարզում:
«Երկու բնակավայրի միջև տարբերությունը, հեռավորությունը 126 կմ է, քանի որ նույն մարդու մասին է խոսքը, ի՞նչ տրանսպորտային միջոցով է տեղաշարժվել»,-հարցրեց ԿԸՀ նախագահը։ Դաշինքի անդամ, ՀԱԿ փոխնախագահ Լևոն Զուրաբյանը պատասխանեց, որ նման հարց տալը, բնականաբար, չի հետապնդում ինչ-որ բան ճշտելու նպատակ:
«Այդ հարցն իրականում պնդում է: Այդ քաղաքացին չէր կարող լինել նույն տեղում, ուստի և այս տեղեկությունը չի կարող համարվել հավաստի: Իրականում սա պնդում է՝ քողարկված հարցի շղարշի ներքո, ինչպես նաև տրված հարցերի մեծամասնությունը»,-ասաց նա:
Լևոն Զուրաբյանը դատարանին առաջարկեց դադարեցնել այս պրակտիկան, երբ փաստերը և պնդումները ներկայացնում են որպես հարց:
«Եթե պնդում ունեք, ասեք ձեր բացատրության ժամանակ։ Անդադար փորձ է արվում պատասխանող կողմից ներկայացնել առանձին դրվագներ, պնդումներ՝ որպես հարցեր»,-ասաց նա: Իսկ Սահմանադրական դատարանի նախագահ Գագիկ Հարությունյանն ասաց, որ այդ մասին ինքն արդեն հայտարարել է, որ պնդումները ներկայացվեն բացատրություններում:










