Պետդեպը վերջին մոտ 20 տարվա ընթացքում առաջին անգամ հրաժարվել է Ռամադանին նվիրված միջոցառումների անցկացումից. Reuters

ԱՄՆ պետքարտուղար Ռեքս Թիլերսոնը մերժել է իր գլխավորած գերատեսչությունում մահմեդականների համար սուրբ համարվող Ռամադան ամսին նվիրված միջոցառումների անցկացման մասին առաջարկը, հայտնում է Reuters գործակալությունը՝ Պետդեպում աղբյուրների հղումով։

Նշենք, որ Ռամադանը սկսվում է մայիսի 27-ից։

Գործակալության տվյալների համաձայն՝ 1999 թվականից ԱՄՆ արտաքին քաղաքական գերատեսչությունում Ռամադանին նվիրված միջոցառումներ են անցկացվում։ Այս ավանդույթի սկիզբը դրել է Մադլեն Օլբրայթը, հետագայում այս ավանդույթին հետևել են գերատեսչությունը գլխավորած թե՛ հանրապետականները, թե՛ դեմոկրատները։

Սակայն այս տարի Թիլերսոնը մերժել է Պետդեպում այս իսլամական տոնին նվիրված միջոցառման նշման առաջարկը։ Գործակալության տվյալների համաձայն՝ դեռ ապրիլի սկզբին գերատեսչության համապատասխան բաժինը դիմել է պետքարտուղարին նման միջոցառումներ անցկացնելու առաջարկով, սակայն մերժում ստացել։  

Ուրբաթ գերատեսչության պաշտոնական կայքում հրապարակվել է Թիլերսոնի անունից շնորհավորական ուղերձ։ «ԱՄՆ-ի, Պետքարտուղարության և իմ անունից անկեղծորեն մաղթում եմ աշխարհի մահմեդականներին խաղաղ և ուրախ Ռամադան»,- ասվում է հաղորդագրությունում։

Reuters-ը հավելում է, որ Պետդեպում գոյություն ունի տարբեր կրոնական տոներին նվիրված միջոցառումների անցկացման պրակտիկա։