Իրանում լուրջ չեն վերաբերվում թուրքական ԶԼՄ-ների տեղեկությանը, թե Թեհրանի ահաբեկիչներն Իրան են անցել ՀՀ տարածքով. Կարեն Խանլարյան

16:18 • 13.06.17

Իրանում պաշտոնական մակարդակով որևէ կերպ չի  քննարկվում թուրք-ադրբեջանական լրատվամիջոցների տարածած այն տեղեկությունը, որ  Հայաստանից են Թեհրանում ահաբեկչություն կատարողները մուտք գործել Իրան:

Tert.am-ի հետ զրույցում այդ մասին ասաց Իրանի Մեջլիսի հայազգի պատգամավոր Կարեն Խանլարյանը՝ անդրադառնալով թուրքական և ադրբեջանական ԶԼՄ-ների տեղեկությանը, թե Թեհրանի ահաբեկչություններն իրագործողները Իրան են անցել Հայաստանի տարածքով:

Հիշեցնենք՝ նրանք հղում էին արել  Թուրքիայում գործող  «Հայերի անհիմն հավակնությունների դեմ պայքարող միջազգային հանրություն» կազմակերպության (ASİMDER) առաջնորդ Գյուքսել Գյուլբեյին:

«Կարծում եմ, որ Իրանում բոլորովին էլ լուրջ չեն վերաբերում էս հարցին, և ոչ ոք այս մասին չի խոսում, իմ ականջին չի կպել, ընդամենը մեր հայրենակիցներն են այստեղ ինձ այս մասին հարցրել, շատ նեղ շրջանակ էս մասին երևի լսել է կամ լուրջ է վերաբերել»,-ասաց Իրանի խորհրդարանի հայազգի պատգամավորը:  

Կարեն Խանլարյանը նկատեց, որ, եթե զգա ակնարկ, որ Իրանում կան թուրք-ադրբեջանական այս քարոզչությանը հավատացողներ, անպայման որպես հայազգի պատգամավոր հետամուտ է լինելու, որպեսզի այս հարցում անհրաժեշտ պարզաբանումներ լինեն, հարցը քննարկվի, քննվի:

«Բայց հարցն այն է, որ Իրանի անվտանգության համակարգը շատ լավ է իմանում, թե ով որտեղից է եկել, ինչպես է եկել, ինչ ուղղությամբ է շարժվել»,-ասաց նա: