ՄԻԵԴ-ը ՀՀ-ի դեմ հերթական վճիռն է կայացրել. Հայաստանը պարտավորվել է դիմումատուին 3600 եվրո վճարել

21:32 • 15.06.17

Մարդու իրավունքների եվրոպական դատարանը Հայաստանի դեմ հերթական վճիռն է կայացրել: ՄԻԵԴ-ը ՀՀ-ին պարտավորեցրել է դիմումատուին վճարել, ընդհանուր առմամբ, 3600 եվրո: Tert.am-ը այս մասին տեղեկացավ Մարդու իրավունքների եվրոպական դատարանում Հայաստանի Հանրապետության ներկայացուցչության կայքից:

Մարդու իրավունքների եվրոպական դատարանը այսօր հրապարակել է «Դնգիկյանն ընդդեմ Հայաստանի» գործով վճիռը, որով արձանագրել է Մարդու իրավունքների եվրոպական կոնվենցիայի 6-րդ հոդվածի 1-ին կետի (արդար դատաքննության իրավունք) և թիվ 1 Արձանագրության 1-ին հոդվածի (սեփականության իրավունք) խախտում:

Գործը վերաբերում է դիմումատուի օգտին կայացված դատական ակտի շարունակական չկատարմանը: Դիմումատուն, պնդել է, որ ներպետական մարմինները չեն ձեռնարկել անհրաժեշտ բոլոր միջոցները իր օգտին կայացված վճիռը կատարելու համար` պատճառաբանելով,  որ խնդրո առարկա ռեստորանային համալիրը դեռևս գործում էր և այն չքանդելու համար բացակայում էին համապատասխան տեխնիկական սարքավորումները:

Արդյունքում, Եվրոպական դատարանը եզրահանգել է, որ ՀՀ իշխանությունների կողմից տարիներ շարունակ վճռի պահանջները չկատարելը հանգեցրել է Կոնվենցիայի 6-րդ հոդվածի 1-ին կետի խախտման: Հաշվի առնելով այն հանգամանքը, որ վճռի չկատարումը ազդեցություն է ունեցել նաև դիմումատուի գույքային իրավունքների վրա` Եվրոպական դատարանն արձանագրել է նաև Կոնվենցիային կից` թիվ 1 Արձանագրության 1-ին հոդվածի խախտում:

Եվրոպական դատարանը Հայաստանի Հանրապետությանը պարտավորեցրել է դիմումատուին վճարել, ընդհանուր առմամբ, 3,600 եվրո` որպես ոչ նյութական վնասի փոխհատուցում: