Անտառային հրդեհների պատճառով Պորտուգալիայում զոհվել է ավելի քան 40 մարդ. նրանցից 16-ը կենդանի այրվել է ավտոմեքենաներում (լուսանկարներ)
Պորտուգալիայում անտառային հրդեհների զոհ է դարձել առնվազն 43 մարդ, նրանց մի մասը հայտնվել է հրդեհի թակարդում, երբ նրանց ավտոմեքենաներն արգելափակման մեջ են հայտնվել ճանապարհի վրա, գրում է BBC-ի ռուսական ծառայությունը:
Եվս 59 մարդ՝ այդ թվում հրշեջներ, ստացել են տարբեր ծանրության այրվածքներ:
Երկրի վարչապետ Անտոնիու Կոշտան տեղի ունեցածն անվանել է «մեծ ողբերգություն»:
«Զոհերի թիվը դեռ կարող է մեծանալ»,- նախազգուշացրել է վարչապետը՝ ելույթ ունենալով քաղաքացիական պաշտպանության ծառայության գլխավոր գրասենյակում:
Ներքին գործերի հարցով պետական քարտուղար Խորխե Գոմեսը լրագրողներին հայտնել է, որ 16 մարդ կենդանի այրվել է ավտոմեքենաներում երկրի արևելքում գտնվող Պեդրոգան-Գրանդի քաղաքի ավտոճանապարհի վրա: Նրանք փորձում էին հեռանալ անտառային հրդեհների տարածքից:
Նշվում է, որ կրակը տարածվում է մեծ արագությամբ՝ միաժամանակ շարժվելով չորս ուղղությամբ:
Պորտուգալիայի որոշ շրջաններում վերջին օրերին ջերմաստիճանը գերազանցում էր 40 աստիճանը:














