Ինչպես է տեղի ունեցել Տուլայում հայկական միկրոավտոբուսի վթարը. Երթուղին սպասարկող ընկերության ղեկավարը մանրամասներ է պատմում
Ռուսաստանի Դաշնության Տուլայի շրջանում հունիսի 18-ին վթարված Երևան-Մոսկվա միկրոավտոբուսի վարորդ Կարապետ Մողրովյանի վրան են փորձում բարդել վթարի ամբողջ մեղավորությունը․ այս մասին Tert.am-ին հայտնեց «Քոչար տուր» ընկերության տնօրեն Արամ Քոչարյանը, որին է պատկանում վթարված մեքենան:
«Կարապետի հետ խոսել եմ, ինքը պատմել է, որ ԿԱՄԱԶ-ը կանգնած է եղել և կտրուկ տեղից պոկվել է, Կարապետն էլ հնարավորություն չի ունեցել փախցնելու, որովհետև երկկողմանի ճանապարհ է եղել, կողքից այլ մեքենաներ են ընթացել, փորձել է կանգնեցնել մեքենան ու հարվածել է ԿԱՄԱԶ-ին: Միևնույն գծով էին ընթանում, այնպես չէ, որ Կարապետը դուրս է եկել իր գծից,- ասաց Արամ Քոչարյանը՝ հավելելով, որ ԿԱՄԱԶ-ի վարորդը ոստիկանությունում ցուցմունք է տվել, որ ինքն է մեքենան քաշել միկրոավտոբուսի դիմաց,- բայց հետո ցուցմունք է տվել, որ սխալվել է, ցուցմունքը սխալ է տվել, ինքը իր ճանապարհով է գնացել, միկրոավտոբուսը հետևից խփել է: Եթե մեղավոր չէր, ինչու՞ է փախել վթարից հետո․ ոստիկաներն են նրան բռնել»:
Արամ Քոչարյանի փոխանցմամբ՝ հիմա ՌԴ-ում փորձում են վթարի մեղավորությունը բարդել հայ վարորդի վրա: «Այնտեղի Հայաստանի դեսպանատունը օգնել է վարորդին: Շատ շնորհակալ ենք իրենցից, ամեն ինչով օգնել են վթարի ենթարկվածներին: Հիմա փորձում են նաև աջակցել վարորդ Կարապետ Մողրովյանին իրավական աջակցություն ցույց տալու հարցում»,- պատմեց նա:
Արամ Քոչարյանը պատմեց, որ վթարից մահացած վարորդներից Նասիրով Օթարն իր ընկերն էր՝ Հայատանի քաղաքացի, ազգությամբ եզդի: Նրա խոսքով՝ Կարապետ Մողրովյանն էլ իր ընկերն է, սոցիալապես վատ վիճակում է ապրել, չորս երեխա ունեցել, փորձել է նրան օգնել՝ առաջարկելով երբեմն միկրոավտոբուս վարել տարբեր ուղղություններով: «Նա վթարից ընդամենը քերծվածքներ էր ստացել, դրա համար հրաժարվել էր բուժօգնությունից»:
Արամ Քոչարյանի խոսքով՝ վթարի հետևանքով՝ գիշերվա տվյալներով՝ վիրավորվածներց երեքն են տեղափոխվել են հիվանդանոցներ, մնացածը թեթև քերծվածքներ են ստացել:
Հիշեցնենք, որ հունիսի 18-ին, ժամը 14.13-ին ՀՀ արտակարգ իրավիճակների նախարարություն տեղեկություն է ստացվել, որ Ռուսաստանի Դաշնության Տուլայի շրջանում` Մոսկվա-Երևան ավտոճանապարհի 133-րդ կմ-ին, տեղի է ունեցել ՃՏՊ՝ բախվել են «ԿԱՄԱԶ» մակնիշի բեռնատար ավտոմեքենան և միկրոավտոբուսը:
Պատահարի հետևանքով մահացել էր 1, տուժել՝ 6 քաղաքացի: Մահացածը միկրոավտոբուսի վարորդներից Նասիրով Օթարն էր:










