Հնդկուհին ծննդաբերել է չվերթի ժամանակ. ավիաընկերությունը ցմահ անվճար ճամփորդելու տոմս է նվիրել նորածնին
Հնդկական Jet Airways ավիաընկերության ինքնաթիռներից մեկի ուղևորուհին առողջ տղա է լույս աշխարհ բերել 10.6 կմ բարձրության վրա գտնվող օդային փոխադրամիջոցում:
Ինչպես նշում է Al Arabiya-ն, ինքնաթիռն իրականացնելիս է եղել Դամամ (Սաուդյան Արաբիա)-Կոչի (Հնդկաստան) չվերթը, երբ հղիության 32-րդ շաբաթում գտնվող երիտասարդ հնդկուհու մոտ վաղաժամ ծննդաբերական ցավեր են սկսվել:
Բարեբախտաբար, ուղևորների մեջ բժիշկ է եղել, որն օգնել է ծննդկանին:
Աղբյուրը մանրամասնում է, որ արտակարգ պատահարի պատճառով 162 ուղևորով Boeing 737 օդանավը վայրէջք է կատարել Մումբայում, որտեղ կինն ու նորածինը հոսպիտալացվել են:
Jet Airways-ի ներկայացուցիչը նշել է, որ սա առաջին դեպքն է, երբ իրենց չվերթի ժամանակ երեխա է ծնվել: Բացի այդ, ավիաընկերությունը երեխային իրենց օդանավերից ցմահ անվճար օգտվելու հնարավորություն է ընձեռել:










