Ստամբուլից Թբիլիսի ուղևորվող ինքնաթիռին կայծակ է հարվածել

10:31 • 19.06.17

Ստամբուլից Թբիլիսի ուղևորվող Atlas Global ավիաընկերության ինքնաթիռին կայծակ է հարվածել, ինչի հետևանքով այն ստիպված է եղել վերադառնալ Աթաթուրքի անվան օդանավակայան: Այդ մասին լրագրողներին հայտնել են ուղևորները, գրում է «ՌԻԱ Նովոստի»-ն:


Ուղևորների տվյալներով՝ կայծակը հարվածել է ինքնաթիռին թռիչքից մի քանի րոպե անց, ինչի հետևանքով անձնակազմը որոշում է կայացրել վերադառնալ Աթաթուրքի անվան օդանավակայան: Թբիլիսիի ուղղությամբ չվերթն իրականացվել է մի քանի ժամ անց:


«Թռիչքից 15-20 րոպե անց բոլորը նկատեցին վառ լույս, և կայծակը հարվածեց ինքնաթիռին: Դրանից հետո սկսվեցին կառավարման հետ խնդիրներ, հետևաբար՝ օդաչուն որոշում կայացրեց վերադառնալ օդանավակայան»,- լրագրողներին ասել է ուղևոր Դավիդ Լոլաձեն:


Մեկ այլ ուղևոր հայտնել է, որ միջադեպի հետևանքով տուժածներ չկան, սակայն, տեղեկությունների համաձայն, ինքնաթիռը վնասվել է, և հենց այդ պատճառով է որոշվել վերադառնալ օդանավակայան:


Օդանավակայանի մամուլի ծառայությունից լրագրողներին հայտնել են, որ Ստամբուլ-Թբիլիսի չվերթն իրականացվել է ուշացումով՝ վատ եղանակային պայմանների պատճառով: