Մեքսիկայի բանտերից մեկում բողոքի ակցիան վերաճել է զանգվածային անկարգությունների
Մեքսիկայի Նուևո Լեոն նահանգում գտնվող «Տոպո Չիկո» բանտում բանտարկյալների բողոքի ակցիան վերաճել է զանգվածային անկարգությունների:
Ինչպես փոխանցում է ТАСС գործակալությունը, բանտարկյալների դժգոհության պատճառ է հանդիսացել լուրը, թե բանտը գրեթե ամբողջությամբ կարող է անցնել վերջերս այդտեղ տեղափոխված շատ վտանգավոր հանցագործի վերահսկողության տակ:
Շրջանի անվտանգության ուժերի ներկայացուցիչ Ալդո Սուասուայի հաղորդմամբ՝ բողոքի ակցիային մասնակցել է շուրջ 3000 մարդ:
Ըստ նրա՝ լուրը միտումնավոր է տարածվել բանտարկյալների շրջանում՝ մթնոլորտն ապակայունացնելու համար:
Զանգվածային անկարգությունները սաստելու համար ոստիկանները ստիպված են եղել օգտագործել արցունքաբեր գազ, երկու բանտարկյալ ստացել են վնասվածքներ, սակայն նրանց կյանքին վտանգ չի սպառնում:
Նշենք, որ 2016թ.-ի փետրվարին նույն բանտում տեղի ունեցած բախումների զոհ էր դարձել 49 մարդ:










