ԵՄ քաղաքացիները կկարողանան Brexit-ից հետո մնալ Մեծ Բրիտանիայում. Թերեզա Մեյ

12:46 • 23.06.17

Եվրամիության անդամ երկրների քաղաքացիները կկարողանան Միացյալ Թագավորությունում մնալ երկրի՝ ԵՄ-ից դուրս գալու (Brexit) գործընթացի ավարտից հետո: Այդ մասին ուրբաթ հայտարարել է Մեծ Բրիտանիայի վարչապետ Թերեզա Մեյը, գրում է BBC-ի ռուսական ծառայությունը:


Նախկինում հաղորդվել է, որ վարչապետը մերժել է Բրյուսելի ծրագրերը, որոնցով առաջարկվում էր դիտարկել ԵՄ դատարանում այդ քաղաքացիների իրավունքների մասին վեճերը:


«Ես ցանկանում եմ վստահեցնել ԵՄ քաղաքացիներին, ովքեր տուն են ձեռք բերել Մեծ Բրիտանիայում, որ նրանցից ոչ ոք ստիպված չի լինի հեռանալ»,- ասել է նա լրագրողներին Բրյուսելում Եվրոպական խորհրդի լիագումար նիստին:


Մեյը նշել է, որ Բրիտանիան պատրաստ է քաղաքացիներին, ովքեր առնվազն հինգ տարի ապրում են Միացյալ Թագավորությունում, տրամադրել կացության մշտական իրավունք, ինչը նրանց թույլ կտա առանց խոչընդոտների ապրել երկրում և օգտվել կրթության և առողջապահության պետական ծառայություններից, ինչպես նաև սոցիալական նպաստներից: Նա ընդգծել է, որ իր առաջարկը գործում է միայն այն դեպքում, եթե նույնպիսի իրավունքներ տրամադրվեն նաև ԵՄ մյուս երկրներում բնակվող բրիտանացի քաղաքացիներին:


Բրիտանիայում այժմ ապրում է մոտ 3,2 միլիոն ԵՄ քաղաքացի, իսկ մյուս 27 երկրում՝ 1,2 միլիոն բրիտանացի: