«Ծառուկյան» խմբակցության քվեարկությունը կառավարության ծրագրին վարչապետի անձով պայմանավորված չէ. Նաիրա Զոհրաբյան
ԱԺ «Ծառուկյան» և «Ելք» խմբակցությունների պատգամավորները երեկ դեմ քվեարկեցին կառավարության ներկայացրած ծրագրին, սակայն մամուլում գրվեց, որ անհատական քվեարկության էլեկտրոնային համակարգում արձանագրված էր, որ «Ծառուկյան» խմբակցությունից ոչ բոլորն են ենթարկվել խմբակցության պահանջին: Մասնավորապես Գյումրիի նախկին քաղաքապետ, նախկին ՀՀԿ-ական, իսկ այժմ «Ծառուկյան» խմբակցության պատգամավոր Վարդան Ղուկասյանը կառավարության ծրագրին կողմ էր քվեարկել: Վարդան Ղուկասյանը անդրադառնալով նշվածին, ասել էր, որ դա «մուտիլովշիկություն» է, տեխնիկական սխալ, ինքը 7-ը ձեռքով դեմ է:
«Ծառուկյան» խմբակցության պատգամավորներ Վանիկ Ասատրյանը և Մարինա Մարգարյանը քվեարկելու հնարավորություն չէին ունեցել ՝ կոճակի պատճառով:
Tert.am-ի հետ զրուցում ԱԺ «Ծառուկյան» խմբակցության պատգամավոր Նաիրա Զոհրաբյանն ասաց, որ խմբակցության բոլոր պատգամավորները դեմ են քվեարկել:
«Անմիջապես քվեարկությունից հետո, հենց դահլիճում պարոն Ղուկասյանը ԱԺ կանոնակարգ համաձայն կանգնեց ոտքի և քարտուղարությանն իրազեկեց , որ շփոթություն է տեղի ունեցել, ավելին՝ երկու պատգամավորները, ում քվեարկության կոճակը չէր աշխատել, Մարինա Մարգարյանը և Վանիկ Ասատրյան ևս դահլիճում անմիջապես, ինչպես պահանջում է կանոնակարգը տեղեկացրեցին, որ իրենց քվեարկության կոճակը չի աշխատել, ուստի պետք չէ փնտրել ինտրիգ այնտեղ, որտեղ այն ուղղակիորեն բացակայում է»,-մանրամասնեց նա:
Նաիրա Զոհրաբյանը շեշտեց, որ կառավարության ծրագրի վերաբերյալ տարաձայնություններ իրենց խմբակցություն չկան:
«Տարբեր քվեարկությունների ժամանակ բոլոր խմբակցություններում՝ թե՛ «Ելք», թե՛ «Հանրապետական» լինում են դեպքեր, որ պատգամավորների քվեարկության կոճակը չի աշխատում, կամ չեն հասցնում քվեարկել, կանոնակարգը թույլ է տալիս հենց դահլիճում քարտուղարությանը իրազեկել ՝իրականում ինչպես են քվեարկել և քարտուղարությունն այն ընդունում է ի գիտություն»,-ընդգծեց պատգամավորը:
Նաիրա Զոհրաբյանը նաև վստահեցրեց, որ իրենց քվեարկությունը պայմանավորված չի եղել վարչապետի անձի հետ, նրա դեմ արշավ չի իրականացվում:
«Քաղաքական գործընթացները Ծառուկյան դաշինքը երբեք չի անձնավորել , չի անձնավորում: Մեր ելույթներում մենք հիմնավորել ենք, թե ինչու ենք դեմ քվեարկում կառավարության ծրագրին»,-շեշտեց նա:
Հիշեցնենք, որ Աժ-ում «Ծառուկյան դաշինք» խմբակցության պատգամավոր, ԱԺ փոխխոսնակ Միքայել Մելքումյանն էլ իրենց դեմ քվեարկելը պայմանավորեց կառավարության աշխատանքով՝ ասելով, որ մի շարք ոլորտներում կառավարությունը ձախողել է և չի ենթարկվել քաղաքական պատասխանատվության, իսկ նոր Ծրագիրը հետընթաց ի ծրագիր է:
Հիշեցնենք նաև, որ կառավարության ծրագիրն ԱԺ-ում ընդունվեց 64 կողմ, 31 դեմ, 0 ձեռնպահ ձայների հարաբերակցությամբ :










