Նվագախմբերի համերգով մեկնարկել են ՀՀ–Մեծ Բրիտանիայի միջև դիվանագիտական հարաբերությունների հաստատման 25-ամյակին նվիրված միջոցառումները

11:14 • 24.06.17

Հունիսի 22-ին Ազատության հրապարակում hայկական և բրիտանական նվագախմբերի համերգով սկիզբ դրվեց Հայաստանի և Մեծ Բրիտանիայի միջև դիվանագիտական հարաբերությունների հաստատման 25-ամյակին նվիրված միջոցառումների շարքին։ Այս մասին տեղեկացնում են ՀՀ ԱԳՆ մամուլի ծառայությունից։

 

Տոնական ելույթով հանդես եկան ՀՀ Զինված ուժերի Գլխավոր շտաբի զինվորական նվագախումբը և Մեծ Բրիտանիայի և Հյուսիսային Իռլանդիայի Միացյալ Թագավորության պաշտպանության նախարարության «Սալամանկա» նվագախումբն ու բրիտանական բանակի շեփորահարները։

 

Հայաստանի և Մեծ Բրիտանիայի դիվանագիտական շփման քառորդ դարը շնորհավորեց ԱԳ նախարարի տեղակալ Կարեն Նազարյանը, ով, անդրադարձ կատարելով ՀՀ և ՄԹ միջև հաստատված սերտ համագործակցությանը, նշեց, որ նմանօրինակ միջոցառումները կոչված են նպաստելու փոխճանաչելիությանը, մեր հանրությունների, մասնավորապես, երիտասարդության միջև շփումների ավելացմանը կրթության, գիտության և մի շարք այլ բնագավառներում:

 

Կ.Նազարյանն իր խոսքում նաև ընդգծեց, որ երկու երկրները հաջողությամբ համագործակցում են երկկողմ և բազմակողմ հարթակներում՝ ուշադրության առանցքում պահելով միջազգային հանրությանը սպառնացող մարտահրավերներն ու դրանց դիմագրվման խնդիրները, և հույս հայտնեց, որ համատեղ ջանքերով ոչ միայն կպահպանվի սերտ փոխգործակցության դրական դինամիկան, այլև որակական նոր մակարդակի վրա կբարձրացվի միջպետական երկխոսությունը:

 

Միջոցառմանը ներկա էին ՀՀ պաշտպանության նախարար Վիգեն Սարգսյանը, ՄԹ դեսպանը, դիվանագիտական կորպուսի ներկայացուցիչներ, մեծ թվով երևանցիներ ու մայրաքաղաքի հյուրեր: